Саха сиригэр олохтоох салайыныы икки таһымнаах тиһигин саҥа федеральнай сокуон чэрчитинэн хаалларыахтара. Бу туһунан өрөспүүбүлүкэ баһылыга Айсен Николаев “Саха Сирэ, инники!».
«Билигин чуолаан олохтоох салайыныы бэрэстэбиитэллээх органнара, ол эбэтэр бөһүөлэктэр, сэлиэнньэлэр, оройуоннар, куорат уокуруктарын таһымнарыгар депутаттар сэбиэттэрэ олус улахан суолталаах буолуохтара. Кинилэр федеральнай сокуон быһыытынан, ханнык эмэ быраап сыһыаннаһыыларын олохтуур өттүгэр улахан боломуочуйалаах буолуохтара», — диэн бэлиэтээтэ Айсен Николаев.
Санатан эттэххэ, 2025 с. ылыллыбыт 33-ФЗ №-дээх Федеральнай сокуон олохтоох салайыныы органнарын аһаҕас былаас биир кэлим ситимигэр интеграциялааһын сабаҕаланар. Сокуон олохтоох салайыныы органнарын тэрийии, боломуочуйалары уларытыы уонна кинилэри үбүнэн хааччыйыы саҥа принциптэрин бигэргэтэр.
«Биһиги билигин өрөспүүбүлүкэбитигэр олохтоох салайыныы икки таһымнаах тиһигин хаалларарга сананныбыт. Ил Тумэн депутаттара маннык этиини өйүөхтэрэ диэн эрэллээхпин. Маннык этиилэри олохтоох салайыныы баһылыктарын талыы тиһигин уларытыыга биэриэхпит, чопчу бэрэстэбиитэллээх былаас органнарын, депутаттар сэбиэттэрин нөҥүө нэһилиэнньэ депутаттары талыаҕа. Оттон депутаттар салгыы оройуоннар, бөһүөлэктэр уонна сэлиэнньэлэр таһымнарыгар эмиэ олохтоох салайыныы баһылыктарын талыахтара. Билигин дьүүллэһии барар, сыл бүтүөр диэри ити уларытыылары барытын ылыныахтаахпыт», — диэн өрөспүүбүлүкэ баһылыга эбэн эттэ.
Саха сирин баһылыга муниципальнай депутаттар форумнарыгар олохтоох салайыныы органнара, депутатскай корпуһу киллэрэн туран, кадрдары күүһүрдүүнү ирдииллэрин эттэ. Бу боппуруоска Николаев Россия президенэ Владимир Путин анал байыаннай дьайыы кыттыылаахтарын салайар структураларга интеграциялааһын туһунан көҕүлээһинин өйөөтө.
This post was published on 01.09.2025 17:25 17:25