Саха Сиригэр олохтоох көҕүлээһиннэри өйүүр бырагырааманан (ППМИ) куонкуруска бастакы сайаапка киирдэ. Тас ититэр ситимнэри өрөмүөн бырайыагын Өлүөхүмэ нэһилиэгэ ыытта диэн үп министиэристибэтин пресс-сулууспата иһитиннэрэр.
Нэһилиэк баһылыга Евгения Янкова этэринэн, ититэр ситимнэри өрөмүөннээһин уопсай сыаната 3 мөл. солк., оттон 2 мөл.солк. субсидияҕа сайаапка киирдэ. Куонкуруска кыттар бырайыагы талыыга 463 олохтоох киһи кытынна.
«Нэһилиэнньэ көхтөөхтүк кыттара үөрүүлээх, нэһилиэк сиригэр-уотугар өрөспүүбүлүкэтээҕи бырагырааманы олоххо киллэриигэ өйөбүлүн биллэрэр. Өрөспүүбүлүкэ, олохтоох дьаһалта, спонсордар уонна нэһилиэнньэ бииргэ кыһамньыларынан эрэ гражданнар хаачыстыбалаах уонна куттала суох олохторун-дьаһахтарын хааччыйар кыахтанар. Туспа өрөспүүбүлүкэтээҕи казначейство бюджет көҕүлээһинин отделын үлэһиттэригэр махтаныахпын баҕарабын, кинилэр мэлдьи сибээскэ сылдьаллар, ханнык баҕарар уустуктарга тута көмө көрдөһөбүт, кинилэр биһигини бу хайысханан үлэлиирбитигэр тирэх буолаллар», — диэн Евгения Янкова кэпсээтэ.
2024 с. Өлүөхүмэ нэһилиэгэ ППМИ кыайыылааҕа буолбута бэлиэтэнэр. Оччолорго нэһилиэккэ олохтоох кылабыыһа күрүөлэммитэ.
Санатан эттэххэ, ППМИ куонкурсун сүүмэрдээһинэ сэтинньи 14 күнүгэр диэри ыытыллар. Бу кэм устата кыттааччылар куонкурус сайаапкаларын сигэнэн толоруохтарын наада.
Докумуон дьиҥнээхтэрин кумааҕынан 677980, Дьокуускай, Киров уулуссата, 12, Саха сирин Үбүн Министиэристибэтэ, 6008 кабинет диэн аадырыска аҕалыахха сөп. Куонкуруска кыттыы, сайаапканы толоруу бары боппуруостарыгар инициативнай бюджетирование салаатыгар 34-45-72, 42-59-45 төлөпүөнүнэн эрийиэххэ эбэтэр электроннай почтаҕа суруйуохха сөп 6008ppmi2@mail.ru.
This post was published on 31.10.2025 11:33 11:33