Үөһээ Дьааҥытааҕы оройуоннар ыккардыларынааҕы борокуратуура ойуурдарга баһаартан сэрэхтээх буолуу туһунан сокуону тутуһууну бэрэбиэркэлээтэ. Ааспыт сыл ыам ыйыгар Эбээн-Бытантай оройуонун Түһээгир нэһилиэгин сиригэр түөрт гектар иэннээх ойуур баһаара бэлиэтэммитэ быһаарылынна.
Умайыы төрүөтүнэн уматыгын систиэмэтэ алдьаныылаах тырааныспарынан сылдьыы буолбут. Ол түмүгэр таһаарар турбаттан кыым хаппыт үүнээйигэ түбэспит, онтон уот ойуурга тарҕаммыт. Буруйдаах умайбыт от тохтообутун хонтуруоллаабакка, быһылаан буолбут сириттэн барбыт. Борокуруор ирдэбилинэн суут буруйданааччыттан ойуур баһаарын умуруорууга ороскуоттаммыт 50 тыһыынча солкуобайы ирдээтэ.
Борокуратуура сэрэтэринэн, ойуурдарга баһаартан куттал суох буолуутун быраабылаларын кэһии 8.32 (ойуурга баһаартан куттал суох буолуутун быраабылаларын кэһии), 20.4 (баһаартан куттал суох буолуутун быраабылаларын кэһии) уонна 20.6 (ыксаллаах быһыыны-майгыны сэрэтиигэ уонна туоратыыга нуормалар уонна быраабылалар ирдэбиллэрин толорбот буолуу) РФ КоАП 5000-тан икки мөлүйүөн солкуобайга диэри ыстарааптаах административнай эппиэтинэһи, ону тэҥэ РФ ХК 261 ыстатыйатыгар холуобунай эппиэтинэһи (ойуур үүнээйилэрин суох оҥоруу эбэтэр алдьатыы), саамай улахан санкцията уон сылга диэри хаайыллыан сөп.
Ону таһынан баһаар буруйдаахтарыгар ойуур пуондатыгар аҕалыллыбыт хоромньуну, ону тэҥэ баһаары умуруорууга уонна ойууру чөлүгэр түһэриигэ ороскуоту толуйар эбээһинэс сүктэриллэр. Ити барыта РФ Ойуур кодексын 100-с ыстатыйатыгар сөп түбэһиннэрэн.
