Ил Дархан Айсен Николаев өрөспүүбүлүкэ территориятыгар регион таһымнаах «чрезвычайнай ситуация» эрэһиимин олохтуур туһунан соруйда. Маннык дьаһал ойуур баһаарын умуруорууга күүһү уонна сириэстибэни эбиигэ, ол иһигэр федеральнайдааҕы саппаастан баһаарынайдары уонна техниканы ылыыга туһалаах буолуоҕа, суруйда регион салалтатын пресс-сулууспата.
Баһаартан куттал суох буолуутун хааччыйар хамыыһыйа мунньаҕар эппиттэринэн, Саха сиригэр билигин 17 муниципальнай тэриллиигэ 46 ойуур баһаара баар, уот сиэбит уопсай иэнэ 98 тыһыынча гектар.
Ыарахан балаһыанньа билигин Өлүөхүмэ улууһугар бэлиэтэнэр, манна муниципальнай таһымнаах ЧС эрэһиимэ биллэриллэр. Икки уот баар, уопсай иэнэ 20 тыһ гектартан тахса. Олохтоох таһымҥа ЧС эрэһиимэ Томпо улууһугар биллэриллибитэ, түөрт уот турар, уопсай иэнэ 35,5 тыһ га.
«Икки муниципальнай тэриллиигэ ЧС биллэриллибитэ өрөспүүбүлүкэ таһымыгар ЧС биллэриитигэр критерий буолар», – диэтэ ойуур хаһаайыстыбатын миниистирэ Евгений Перфильев.
Ойуур уотун умуруорууга 754 киһи кыттар. «Авиалесоохрана» сотрудниктара үлэлииллэр. 125 исписэлиис Өлүөхүмэ оройуонугар кыттар. Иркутскай уобаластан парашютистар уонна десантниктар кэлиилэрэ былааннанар.
18 муниципальнай тэриллиигэ баһаары утары оһуобай эрэһиим биллэриллэн турар.
Ан-26 зондировщик сөмөлүөт бэс ыйын 10 күнүгэр Алдан уонна Нерюнгри оройуоннарыгар үлэлээтэ.
