Атырдьах ыйын 26 күнүгэр өрөспүүбүлүкэ гражданскай оборона дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистири солбуйааччы Никита Павлов бэрэссэдээтэллээх навигация кэмигэр таһаҕаһы тиэйиини сүрүннүүр оперативнай штаб былааннаах мунньаҕа буолла.
Атырдьах ыйын 26 күнүнээҕи көрдөрүүнэн, 1 148 433,3 туонна уопсай былаантан Саха сирин наадыйыытыгар 802,9 тыһыынча туонна таһаҕас тиэйиллэн, былаан 69,9% тэҥнэстэ. Билиҥҥитэ 660,8 тыһыынча туонна тиэрдилиннэ, эбэтэр былааннаммыт кээмэйтэн 57,5%.
Сүбэ мунньах кэмигэр өрөспүүбүлүкэ уһук оройуоннарыгар тыын суолталаах бородууксуйаны, уматыгы тиэрдии билиҥҥи туруга сиһилии ырытылынна.
Навигацияҕа кыттар сүрүн тэрилтэлэр бэрэстэбиитэллэрэ дакылааттары оҥордулар. Кыттааччылар урукку сорудахтары толорууга, ол иһигэр үбүлээһин боппуруостарыгар, Халыма өрүскэ тахсыан сөптөөх халаан уутугар бэлэмнээх буолууга уонна техниканы өрөмүөннээһиҥҥэ болҕомто уурулунна.
Никита Павлов штаб иннигэр тиэйии-таһыы бары кыттыылаахтарыгар чуолкай сүрүннээһини хааччыйар сорук турарын бэлиэтээтэ. Кылгас болдьоххо кыраапыктан хаалбакка уонна былааны толоруу наадатын тоһоҕолоото. Тоҕо диэтэххэ, кыһын устата хотугу улуустар олохторун хааччыйыылара итинтэн быһаччы тутулуктаах.
This post was published on 27.08.2025 10:10 10:10