«Муус устар» ыччат бэстибээлэ икки сылга биирдэ ыытыллыаҕа. Аныгыскы ыытыллыыта 2027 сыл сааһыгар былааннанар.
«Муус устар» бюджеттан таһынан үбүлээһин суотугар ыытыллар. Быйыл босхоломмут үбү-харчыны улахан суолталаах социальнай тэрээһиннэргэ ыытарга быһаарылынна.
«Бэстибээл биһиги ыччаппытын мунньар ситим, кыах, сайдыы, иэйии киэҥ эйгэтэ буолла. Үгүстэр, бэйэм курдук, кинини сөбүлүүллэр, бэйэлэрин көрдөрөр кыахтаахтарын сыаналыыллар диэн билэбин. Бүгүн дойду барыта судургута суох кэми көрсөр. Маннык усулуобуйаҕа саамай сөптөөх быһаарыы — нэһилиэнньэбит социальнай өйөбүлүгэр, табыгастаах олоҕор уонна куттала суох буолуутугар үбү-харчыны ыытыы. Бэстибээл ыытыллар кэмин уларытыы — ыйааһыннаах уонна сөптөөх хардыы. Биһиги өрөспүүбүлүкэбит олохтоохторо үксүлэрэ ону өйдүүллэр дии саныыбын. Эһиилгигэ бэлэмнэниэхпит. Кыайыыбытыгар итэҕэйэбин уонна буойуттарбыт төннүүлэрин кэтэһэбин», — диэн өрөспүүбүлүкэ ыччат дьыалатыгар уонна социальнай коммуникацияҕа миниистирэ Петр Шамаев быһаарда.
«Муус устар» Саха сиригэр 2021 сылтан ыытыллар. Биэс сыл иһигэр регион сүрүн ыччат тэрээһинэ уонна дойду биир бастыҥ ыччат бэстибээлэ буолла.
Бэстибээл сыала-соруга — эдэр талааннары өйөөһүн. Тэрийээччинэн «Эльга» хампаанньа генеральнай спонсор көмөтүнэн Саха сирин бырабыыталыстыбата буолар.
2025 сыллаахха V ыччат бэстибээлэ бары улуустартан уонна куорат уокуруктарыттан 25 тыһыынчаттан тахса кыттааччыны хаппыта.
This post was published on 05.03.2026 18:13 18:13