Дьокуускайтан Өлүөнэ остуолбаларыгар «Михаил Светлов» теплоход маршрутугар Кытыл Элэһин тукулаан аттыгар тохтобул эбиллиэҕэ. 40 миэтэрэлээх кумах куйаара «Өлүөнэ остуолбалара» национальнай паарка сиригэр-уотугар баар.
Ол туһунан быһаарыы национальнай паарка салалтатын уонна ЛОРП бэрэстэбиитэллэрин икки ардыларыгар мунньах түмүгүнэн ылылынна. Өрүттэр ыкса бииргэ үлэлэһэргэ сөбүлэстилэр. Ол курдук, ЛОРП ууга куттал суох буолуутун хааччыйыыга дьарыктаныаҕа, тукулаан аттыгар өрүс дириҥин кээмэйдиэҕэ уонна дьаакардары туруоруоҕа. Нацпарк салалтата тукулааннарга табыгастаах, куттала суох сылдьыыны тэрийэр былааннаах.
Саҥа тохтобул пааркаҕа эбии 2 200 туриһы тардыа диэн сабаҕалыыллар.
ЛОРП 2026 сылга туристическай рейстэр ахсааннарын лаппа элбэтэр былааннаах — 59-тан 84-кэ диэри. Олортон 65-һэ Дьокуускай — Өлүөнэ остуолбалара — Дьокуускай маршрутунан «Михаил Светлов» уонна «Демьян Бедный» теплоходтар толоруохтара.
Маны таһынан Өлүөнэ остуолбаларга диэри айаҥҥа түргэн суднолары үлэҕэ киириэҕэ, диэн иһитиннэрдэ нацпарк дириэктэрэ Аркадий Семенов. Кини этэринэн, туристар сүдү таастарга «биир күн тура» киэбинэн айанныыр кыахтаныахтара.
Эбии партнерскай туристическай хампаанньалар нөҥүө пааркаҕа сылдьар ыалдьыттары барыларын идэтийбит гидтэр, арыаллааччылар илдьэ сылдьыахтара.
This post was published on 12.11.2025 10:09 10:09