Саха сиригэр 2025 сыл саҕаланыытын кытта тэҥнээтэххэ, дьарыктаах буолуу сулууспатын органнарыгар бэлиэтэммит үлэтэ суох дьон ахсаана 401 киһинэн аҕыйаан, 2375 тэҥнэстэ. Бу туһунан нэһилиэнньэ дьарыктаах буолуутугар судаарыстыбаннай кэмитиэт иһитиннэрдэ.
Биэдэмистибэ иһитиннэрэринэн, үлэ биэрээччилэр үлэһиттэргэ наадыйыылара 1385 киһинэн улаатта уонна 9 009 вакансия буолла. Саамай элбэх вакансия сир баайын хостооһун, үөрэх, доруобуйа харыстабылын, атыы-эргиэн, социальнай хааччыйыы, тутуу уонна энергетика эйгэтигэр баар.
Кэмитиэт 2025 сыл бастакы аҥарыгар нэһилиэнньэ дьарыктаах буолуутун сулууспатыгар үлэ көрдөөн 5,6 тыһыынча киһи кэлбитин, онтон 2,3 тыһыынчата үлэҕэ киирбитин бэлиэтээтилэр.
Санатан эттэххэ, өрөспүүбүлүкэҕэ үлэһит ахсаана 2025 сыл муус устар — бэс ыйыгар ортотунан 528 тыһыынча киһиэхэ тэҥ. Экономикаҕа дьарыктаахтар ахсааннара сыл саҕаланыытын кытта тэҥнээтэххэ 3,7 тыһыынча киһинэн эбиллэн 507,9 тыһыынча буолла.
Россия президенэ Владимир Путин көҕүлээбит «Кадрдар» национальнай бырайыак чэрчитинэн Саха сиригэр үлэтэ суох дьоҥҥо уонна гражданнар сорох категорияларыгар 89 бырагырааманан босхо үөрэтии тэрилиннэ. Кэлиҥҥи сылларга экономикаҕа дьарыктаахтар ахсааннара 30 тыһыынчаттан тахса киһинэн улаатта, оттон үлэтэ суох дьон ахсаана 10 тыһыынчанан аҕыйаата.
This post was published on 14.08.2025 10:33 10:33