2023 сыл Саха сиригэр үлэ сылынан биллэрилиннэ. Бу туһунан Айсен Николаев Ил Түмэҥҥэ анал этиитигэр ахсынньы 19 күнүгэр иһитиннэрбитэ. Үүммүт сылга араас эйгэ үлэһиттэрэ тугу былаанныылларын, Саха сиригэр Үлэ сыла биллэриллибитин туһунан туох дии саныылларын СИА-ҕа иһитиннэрдилэр.
«Үлэ сыла элбэх ситиһиилээх буоларыгар итэҕэйэбин, кэтэһэбин. Үлэбитигэр элбэх былааннаахпыт, устудьуоннар этэҥҥэ үөрэх дьылын түмүктээн, үлэҕэ киирэллэрэ элбиэҕэ диэн эрэнэбит. Маны таһынан, профсоюзтар үлэлэрэ күүһрэр, элбэх тэрээһиннэр, сэргэх хамсааһыннар күүтэллэр»
— ГБПОУ СӨ «Р.И.Брызгалова аатынан Транспортнай техникум» преподавателэ Нонна Винокурова.
«Мин санаабар, бу сыл биһигини тургутан көрүөҕэ, ол эрээри үтүө түмүктээх буолуо диэн эрэнэбин. Биллэн турар, үлэбитигэр манна сыһыаннаах тэрээһиннэр буолуохтара. Б күннэргэ хас биирдии үлэһит бэйэтин идеятын, көрүүтүн иһитиннэриэхтээх, ол кэннэ сыллааҕы үлэ былаана чопчу быһаарыллыаҕа»,
— СӨ Национальнай архивын кылаабынай архивиһа Раиса Павлова.
«Сахалар былыр-былыргыттан үлэһит норуотунан биллэбит. Онон быйыл Ил Дархаммын Айсен Николаев Үлэ сылын биллэрбитэ бэлиэ дии саныыбын. Үүммүт 2023 сыл өрөспүүбүлүкэҕэ өссө элбэх ситиһиилээх, таһаарыылаах сы буолуо дии саныыбын «,
— Ем. Ярославскай аатынан Саха мусуойун этонография секторын исписэлииһэ Елизавета Алексеева.
«2023 сыл үлэ сылынан биллэриллибитэ саамай сөптөөх дии саныыбын. Биһиги дьиэ кэргэн оҕолорбутун үлэҕэ сыһыарар сыалтан, быйыл бастакыбытын оҕуруот олордуохтаахпыт. Өлүү-сүтүү аччаатын, ыарыһахтарбыт түргэнник үтүөрдүнэр, коллективка ил-эйэ баар буоллун. Үлэ сылыгар бары үлэһиттэргэ таһаарыылаах үлэни-хамнаһы»,
— Уус Алдан улууһун сэллиги эмтиир диспансер бырааһа Нюргуяна Ширяева.
«Үлэ сиэрдээхтик сыаналаныахтаах. Бырабыыталыстыбаҕа 2023 сыл бастакы кыбаарталыгар «ыйыллыбатах» категорияларга хамнастарын индексациялааһыҥҥа быһаарыы ыларгытыгар сорудахтыыбын, МРОТ-тан кыра буолуо суохтаах», — диэн Айсен Николаев, бэлиэтээн турардаах. Онуоха, 2023 сыл тохсунньу 1 күнүттэн Саха сиригэр тиийинэн олоруу кээмэйэ улаатта — ортотунан 21 706 солк буолла, диэн Үлэ министиэристибэтэ иһитиннэрдэ.
Санатан эттэххэ, Айсен Николаев бастыҥ үлэһит дьоҥҥо 300-түү тыһ солкуобайдаах 50 бириэмийэ аныырын туһунан эппитэ.
