Саха сиригэр 2025 сыл 8 ыйыгар түөрт оҕоҕо неонатальнай скрининг көмөтүнэн сэдэх генетическэй ыарыылар көһүннүлэр, диэн ЯСИА иһитиннэрэр.
Икки саҥа төрөөбүт оҕоҕо быраастар сүрүн иммунодефициты, өссө иккитигэр — “обмен веществ” удьуор ыарыытын буллулар, маннык ыарыыга оҕо олох кыратыгар өлөр.
«Иммунодефициттээх оҕолору быраастар иммунизациялаабакка анал ньыманан көрүөхтэрэ. Оттон удьуор “обмен веществ” ыарыы түбэлтэтигэр оҕолор тас өттүнэн туох да уратыта суохтар. Кэһиилэр иммуннай уонна киин ньиэрбэ ситимнэр өттүлэриттэн бараллар. Ыарыыны эрдэ булан, аһылыгын көннөрүөхпүтүн, тустаах исписэлиистэри тардыахпытын сөп, ол аата оҕолор сөптөөх тэтиминэн улааталларыгар, сайдалларыгар тиэрдэр. Ити аутосомнай-рецессив ыарыыларга сыһыаннаах, ол эбэтэр төрөппүттэр алдьаммыт гены илдьэ сылдьааччылар», — диэн СӨ 1 № — дээх Перинатальнай киинин неонатологическай көмө дириэктэрин солбуйааччы Саргылана Алексеева ЯСИА-ҕа кэпсээтэ.
Скрининг төрүөх уонна удьуор патологияларын, ол иһигэр сүнньүнэн спинальнай быччыҥ атрофиятын уонна бастакы иммунодефициты арыйар кыахтаах. Саҥа төрөөбүт оҕолору хаан анаалыһынан 36 ыарыыга бэрэбиэркэлииллэр.
«Быйыл оҕо доруобуйатын харыстабылын сайыннарыы бырагыраамаларыгар “Дьиэ кэргэн» национальнай бырайыак чэрчитинэн эрдэ төрөөбүт оҕолору көрүүгэ неонатальнай сулууспаҕа олус үчүгэй тэрил ыллыбыт. Бу кувезтар, инкубатордар, ИВЛ аппарааттара», — диэн кэпсээтэ СӨ 1 №-дээх — НЦМ генеральнай дириэктэрэ Станислав Жирков.
This post was published on 18.09.2025 18:33 18:33