Олунньуга Саха сиригэр Кыайыы волонтердарын оскуолатыгар бэлэмнэнии саҕаланыаҕа. Үөрэх бэйэтэ кулун тутар — муус устар ыйдарга өрөспүүбүлүкэ киин куоратын үөрэх тэрилтэлэригэр ыытыллыаҕа. Баҕалаахтар инникитин Кыайыы күнүгэр уонна атын патриотическай событиеларга аналлаах тэрээһиннэри тэрийиигэ кыттыахтара.
«Бу үөрэх эрэ бырагыраамата буолбатах, ыччакка патриотическай позицияны үөскэтэр, историческай өйү-санааны харыстыыр уонна көлүөнэлэр икки ардыларыгар муостаны тэрийэр ураты көҕүлээһин», — диэн Саха сирин ыччат дьыалатыгар уонна социальнай коммуникацияҕа миниистирэ, анал байыаннай эпэрээссийэ кыттыылааҕа Петр Шамаев көҕүлээһин суолтатын тоһоҕолоон бэлиэтээтэ.
Кини Россия президенэ Владимир Путин «Кыайыы волонтердара» хамсааһын Аҕа дойду улуу сэриитин туһунан өйү-санааны харыстааһыҥҥа, патриотическай иитиигэ, СВО бэтэрээннэрин уонна кыттыылаахтарын өйөөһүҥҥэ, ону тэҥэ добровольчество сайдыытыгар кылаатын үрдүктүк сыаналыырын санатта.
«Саха сирин баһылыга Айсен Николаев эмиэ патриотическай иитии салаатыгар тиһиктээх уонна көдьүүстээх үлэ суолтатын мэлдьи бэлиэтиир. Кыайыы волонтердара төрөөбүт дойдуну таптыырга, историяҕа, үгэстэргэ ытыктабылга туһуламмыт араас тэрээһиннэри ыытыыга сүрүн оруолу ылаллар. Пааматынньыктары тупсарыыга акцияларга кытталлар, бэтэрээннэри кытта көрсүһүүлэри тэрийэллэр, хорсун быһыы уруоктарын ыыталлар», — диэн миниистир эбэн эттэ.
This post was published on 02.02.2026 14:14 14:14