Үөрүүлээх тэрээһиҥҥэ былаас уорганын бэрэстэбиитэллэрэ, култуура үлэһиттэрэ, архыып, музей, бибилэтиэкэ сотрудниктара кыттыыны ыллылар.
Култуура миниистирэ Афанасий Ноев култуура, духуобунас уонна история өйдөбүлэ дойду сайдыытын төрүтэ буоларын эттэ. Салайааччы Аҕа дойду улуу сэриитигэр Ийэ дойду көмүскэлигэр турбут аҕа көлүөнэ оруолун өйдүүргэ анаммыт тэрээһин буоларын бигэргэттэ.
Миниистир эппитинэн, дойду историятын хас биирдии киһи тутар, оттон сахалар историяҕа биллэр кылааты киллэрбиттэрэ.
«Аҕа дойду улуу сэриитигэр герой-сахалар, 24 Сэбиэскэй Союз Геройа, бэйэлэрин кэмнэригэр история кырдьыгын уһансыбыттара, Ийэ дойдуну көмүскээбиттэрэ. Оттон бүгүн 11 Саха сириттэн Россия геройа ол история чахчытын салгыыллар, кинилэргэ Россия президенэ тирэҕирэр», — диэтэ кини.
Тэрээһин чэрчитинэн архыып үлэһиттэригэр наҕараадалары туттардылар. История өйдөбүлүн харыстааһыҥҥа кылааттарын иһин бэлиэтэннилэр: Ф.И. Авдеева аатынан оҕо айымньытын дыбарыаһа, Россия социальнай пуондатын Саха сиринээҕи филиалын салаата, «Сахатранснефтегаз», Саха сирин Счетнай палаатата, Саха сирин доруобуйа харыстабылын министиэристибэтэ.
История өйдөбүнньүгүн сыла Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сыллара биллэриллибиттэрин кытта ыкса сибээстээҕин тэрийээччилэр эттилэр.
This post was published on 10.03.2025 17:01 17:01