Саха сиригэр Култуура сылыгар Арассыыйа бэрэсидьиэнэ көҕүлээбит «Дьиэ кэргэн» национальнай бырайыагын олоххо киллэриинэн, сэттэ тутаах салаа тэрилтэтин хапытаалынайдык өрөмүөннүөхтэрэ. Бу туһунан Якутия24 телеханаал “Актуальное интервью” биэриигэ өрөспүүбүлүкэ култууратын уонна духуобунай сайдыытын миниистирэ Афанасий Ноев иһитиннэрдэ.
Ноев этэринэн, хапытаалынай өрөмүөн Саха Өрөспүүбүлүкэтин Национальнай бибилэтиэкэтин сүрүн корпуһугар, академик А.Н. Осипов аатынан хартыына галереятыгар, Сааскылаах сэлиэнньэтигэр Анаабыр кыраайы үөрэтэр музейыгар, Томпо оройуонун Кириэс-Халдьаайы сэлиэнньэтигэр Сэбиэскэй Сойуус Дьоруойа Ф. М. Охлопков дьиэ-музейыгар, Д. К. Сивцев – Суорун Омоллоон аатынан судаарыстыбаннай опера уонна балет тыйаатырыгар, Хаҥалас улууһун Покровскай куорат «Саргы түһүлгэтэ» култуура уонна норуот айымньытын киинигэр ыытыллыаҕа. Ону таһынан П.А. Ойуунускай аатынан Саха академическай театрыгар дьиэ үрдүн сабыыта өрөмүөнэ оҥоһуллуоҕа.
Өрөспүүбүлүкэ култууратын уонна духуобунай сайдыытын миниистирэ эмиэ 2026 сылга 31,5 мөл.солк. суумалаах судаарыстыбаннай опера уонна балет тыйаатырын уонна хотугу сир аҕыйах ахсааннаах норуоттарын тыйаатырын өрөмүөнүгэр барарын бэлиэтээтэ. Өссө 16 мөл. солк. Национальнай художественнай музейы, Аан дойду норуоттарын хомустарын Музейын уонна Киинин уонна Алдан история-кыраайы үөрэтии музейын техническэй хааччыйыыга ыытыллыаҕа.
Санатан эттэххэ, регион баһылыга Айсен Николаев Саха сирин парламеныгар туһаайыы суругар СӨ култууратын уонна духуобунай сайдыытын министиэристибэтигэр бары муниципальнай тэриллиилэргэ култуура олоҕун көрүҥүн, ис хоһоонун тупсарарга сорудахтаабыта. «Онуоха бары кыах баар. Кэнники сылларга өрөспүүбүлүкэҕэ аныгы култуура кииннэрин бүтүн ситимэ тэрилиннэ. Бары уопсастыбаннай олох кииннэрэ, Саха сирин дьонун сырдатыы, айар – тутар, бэйэни көрдөрөр сирдэрэ буолуохтаахтар», — диэн Саха сирин баһылыга Айсен Николаев бэлиэтээбитэ.
This post was published on 20.01.2026 11:01 11:01