РФ бэрэсидьиэнин Уһук Илиҥҥэ боломуочунай бэрэстэбиитэлэ Юрий Трутнев Дьокуускайга сырыытын кэмигэр “Үлэ Кыбаартала” («Квартал Труда») диэн Уһук Илин уокуругар тутулла турар бастакы тиэхиньиичэскэй паарка үлэтин кытары билистэ, диэн бырабыытылыстыба пресс-сулууспата биллэрэр.
Кластерга креативнай бизнес салаалара: аниматордар, киинэ, цифровой контент оҥорооччулар, худуоһунньуктар үлэлиэхтэрэ. Кластер сүрүн хайысхатынан киинэ, анимация уонна цифровой-контент буолуоҕа. Эдэр урбаанньыттары өйүүр сыаллаах, “Медиа-лаб” диэн устуудьуйа баар буолуоҕа. Манна дорҕоон устуохха, хаартыскааҕа түһэриэххэ уонна анимация оҥоруохха сөп диэн былааннанар.
Кластер өссө биир хайысхатынан урбаанньыттары эбии үөрэхтээһин буолуоҕа. Холобура, «Школа глобального бизнеса» эбэтэр «Focus Pro» консалтинговай агентство, урбаанньыттары маркетинг өттүнэн сайыннарыахтара, бэйэ бренын хайдах сөптөөхтүк сайыннарарга үөрэтиэхтэрэ.
Арктическай судаарыстыбыннай култуура уонна искусство института уонна Дьокуускайдааҕы худуоһустубуннай училище дизайн студиятын кластер иһинэн арыйан үлэлэтиэҕэ. Кластер олохсуйар дьиэтигэр лекция ааҕарга, кэмпириэнсийэ ыытарга табыгастаах ол бу көрсүһүү быыстапка буоларыгар сөптөөх хостор баар буолуохтара. Маны таһынан, кластер резиденнарыгар уонна ыалдьыттарыгар анаан, аһыыр сир. спорт саалата үлэлиэҕэ.
70-тахса хампаанньа уонна чааһынай урбаанньыттар «Үлэ Кыбаартала» бырайыак резидена буолуохтарын баҕаралларын биллэрдилэр.Ол быыһагар, «Магдис» киинэхампаанньата, «IT-Generator» анимация устуудьуйата, глабальнай бизнес оскуолата, «Green Apelsin» диэн бырайыактарынан «Дом музыкантов» продюсердар кииннэрэ, цифровой контент пуондата. Бу хампаанньалар кластерга туох бырайыактаах үлэлиэхтэрин баҕаралларын туһунан вице-премьерга кэпсээтилэр.
«Үлэ Кыбаартала» үлэтин 2022 сыл бүтүөр диэри саҕалыахтаах. Кластер тутуутугар уонна наадалаах техниканан хааччыйарга 413 млн харчы «Биир сомоҕо субсидия» диэн бырагырамманан, федеральнай бүддьүөттэн көрүллүөҕэ.
Билигин кластер сайдар стратегията оҥоһуллан бэлэм. «Үлэ Кыбаартала» тутуллуохтаах сирэ-уота быһаарыллан турар. Саҥалыы уларытыллан тутуллубутун кэннэ дьиэ улахана 14,5 кв.м. буолуоҕа. Судаарыстыбыннай экспертиза бырайыак докумуона барыта бэлэм диэн быһаарда.
Кластер бырайыагын дойду таһымыгар өйүөхтэрин син. Бу бырайыагы Айсен Николаев 2020 сыллаахха Ил Түмэн мунньаҕар иһитиннэрбитэ.
Андрей Сорокин түһэриитэ
This post was published on 18.11.2021 20:28 20:28