Федеральнай төлөбүрдэртэн ураты инбэлииттээх Саха сирин олохтоохторо эбии регионнааҕы өйөбүлгэ эрэниэхтэрин сөп. Бу туһунан социальнай ситимнэргэ быһа эфир кэмигэр үлэ уонна социальнай сайдыыга миниистир бастакы солбуйааччы Альбина Трубина иһитиннэрдэ.
«Федеральнай таһымҥа көрүллүбүт чэпчэтиилэр бары Россия Социальнай пуондатын линиятынан бэриллэллэр. Ити инбэлииттэр биэнсийэлэрэ, ыйдааҕы харчынан төлөбүрдэр, реабилитация техническэй сириэстибэлэринэн хааччыйыы, санаторнай-курортнай эмтээһини уонна эмтэри биэрии, ону тэҥэ айан төлөбүрэ. Саха сиригэр инбэлииттээх дьоҥҥо өйөбүл эбии дьаһаллара эмиэ баар, олор өрөспүүбүлүкэ бюджетын үбүнэн оҥоһуллаллар», — диэтэ Трубина.
Миниистир бастакы солбуйааччыта этэринэн, Саха сиригэр 60 тыһыынчаттан тахса инбэлиит киһи олорор, ол иһигэр аҕыс тыһыынча кэриҥэ оҕо.
«30 тыһыынчаттан тахса инбэлиит ОДьКХ төлөбүрүгэр компенсация ылар, онно сыл аайы 880 мөл.солк. кэриҥэ көрүллэр. Биэнсийэҕэ социальнай эбии төлөбүр биһиэхэ регионҥа олохтоммут олох алын кээмэйигэр тэҥнэнэн төлөнөр. Ону тэҥэ олох-дьаһах балаһыанньатыттан көрөн, араас материальнай көмө баар», — диэн Альбина Трубина кэпсээтэ
Регионнааҕы материальнай көмөҕө тиһигин быспакка диализтаах эмтэнэр дьон бырааптаахтар. Маны таһынан, инбэлииттээх дьон федеральнай испииһэккэ көрүллүбэтэх реабилитация техническэй сириэстибэлэрин ылыахтарын сөп, үрдүк эбэтэр орто үөрэххэ үөрэнээччилэр олорор сирдэриттэн айаннарын компенсациялыахтарын сөп, кэтэх хаһаайыстыбалаахтар биирдиилээн урбаанньыттарга анаммыт бырагыраамаларынан үөрэтиини ааһыахтарын сөп.
