Саха сиригэр уопсайа 16,3 гаа иэннээх сиргэ икки ойуур баһаара умайар. Баһаардар Ньурба уонна Нам улуустарыгар бааллар диэн СӨ Экологияҕа, айылҕаны туһаныыга, ойуур хаһаайыстыбатыгар министиэристибэтэ иһитиннэрэр.
Баһаардары умуруорууга анал тэрилтэттэн 37 үлэһит, 7 анал тиэхиньикэ, салгынтан кэтээн көрүүгэ АН-2 уонна Сessna сөмөлүөттэр үлэлииллэр.
Ааспыт суукка иһигэр уопсайа 79 гаа иэннээх биир «ландшафтнай» баһаар умуруорулунна.
Ыам ыйын 6 күнүттэн Саха сиригэр баһаартан сэрэхтээх буолуу сезона биллэриллибитэ. Бу кэмҥэ ойуурга, хонууга сылдьан, кутаа уоттары оттор, бөҕү-сыыһы уматар, табаҕы умулларбакка быраҕар, о.д.а. баһаары күөдьүтүөн сөптөөх дьайыылары оҥорор бобуллар.
