Саха сирин хотонноругар бастакы төрүөх ааспыт сыл ахсынньытыттан саҕаламмыта. Тохсунньуга эбиллии элбэх. Таһырдьа тымныы буолан, хотоннор сылааһа суохтар. Итиэннэ «итэҕэстэр» эмиэ бааллар. «Онон кыра эрдэхтэринэ ыалдьан хаалбатыннар, сылаас сырыттыннар диэн кэтэрдэбит«, — диэн СИА-ҕа ааҕааччыларбыт кэпсээтилэр.
Ирландия фермердара саҥа төрөөбүт ньирэйгэ анал таҥас кэтэрдэллэрин суруйдулар. Оччоҕуна тарбыйахха наадалаах температура тутуллар. Кинилэр төрөөт даҕаны, 15–20°C кыраадыстан намыһаҕа суох туруктаах хотоҥҥо сылдьыахтаахтар. Тохсунньуга — олунньуга салгын температурата өссө да тымныы буолар. Оттон ити кэмҥэ төрүөх эбиллиитэ элбиир.
Саҥа төрөөбүт ньирэй тымныы эбийиэккэ турар буоллаҕына, ыарыыга ылларыан сөп. Итиэннэ фермердар таҥастаах тарбыйахтар түргэнник улааталларын бэлиэтээтилэр.
Таҥаһы сууйуохха сөп.
«Оттон Саха сиригэр ньирэйдэри таҥыннараллар дуо?» диэн ыйытыы биэрбиппэр, Хаҥалас уонна Чурапчы улууһуттан хоруйдар кэллилэр.
Ол курдук Дьөппөн олохтоохторо Яндреевтар итэҕэс ньирэй төрөөбүтүгэр, бэйэлэрин сэлиэччиктэрин кэтэрдибиттэрин кэпсээтилэр. «Сылааһы билэр. Атыттартан төһө да уҥуоҕунан кыратын иһин, тэҥҥэ сылдьар«, — диир хаһаайка.
Оттон Чурапчыттан хаартыска ыыппыт ааҕааччыбыт: «Хотонум тымныы, ол иһин эргэ флис матырыйаалтан тигэн кэтэрдибитим. Итинник анал таҥастар бааллара буоллар, атыылаһыахпыт этэ«, — диэн эттэ.
