Саха АССР 100 сыллаах үбүлүөйүгэр анаммыт Саха сирин уонна АК «АЛРОСА» олохтообут «100 ааттаах алмаастар» бырайыак чэрчитинэн, «Юбилейнай» туруупкаттан хостоммут 60,24 караттаах бөдөҥ алмааска Социалистическай үлэ Геройа Семен Васильевич Горохов аатын иҥэрдилэр.
Семен Горохов 1930 сыллаахха Усуйаана оройуонун Юкагир сэлиэнньэтигэр төрөөбүт. САССР норуотун хаһаайыстыбатын үтүөлээх үлэһитэ.
12 сааһыттан холкуос, ол кээнэ «Усуйаан» сопхуос булчутунан үлэлээн саҕалаабыт. Кини эдэр булчуттарга көхтөөх сүбэһит буолар. Сыл аайы үрүҥ кырса соҕотуопкалааһын былаанын аһара толорор.
Түүлээх бэлэмнээһин XI пятилеткатын болдьоҕун иннинэ толорбутун иһин Ленин,»Үлэ Кыһыл Знамята», «Бочуот Знага» уордьаннарынан, «Серп уонна молот» кыһыл көмүс мэтээлинэн, СССР ВДНХ үрүҥ көмүс уонна боруонса мэтээллэринэн наҕараадаламмыт. 1983 сыллаахха » Чемпион-охотник ЯАССР » аат иҥэриллибит. Социалистическай үлэ героойун аатын 1985 сыллаахха иҥэрбиттэр.
Санатан эттэххэ, 2020 сылтан Саха сирин аҕа баһылыга Айсен Николаев уонна АЛРОСА хампаанньа салалтатын көҕүлээһининэн «Саха сирин судаарыстыбыннаһын 100 сылыгар аналлаах «100 алмаас» диэн холбоһук бырайыак олоххо киирбитэ.
