Бэс ыйыгар Саха сиригэр салгын орто температурата, синоптиктар сылыктыылларынан, нуорматтан биир кыраадыс үрдүө. Хайыы-үйэ 3 чыыһылаттан киин оройуоннарга салгын температурата +23, +28 кыраадыс, оттон соҕуруулуу-илин уонна соҕуруу төрүт +30-ка тиийэр. Ый бастакы аҥаарыгар күн- дьыл туругун туһунан СИА-ҕа Саха УГМС начальнигын солбуйааччы Татьяна Маршалик кэпсээтэ.
«Сылаас ыйы күүтэбит. Бэс ыйыгар орто температура нуорматтан биир кыраадыс үрдүүрэ күүтүллэр. Сөҥүү туһунан этэр буоллахха, Өлүөнэ өрүс үөһээҥи бассейныгар, Ленскэй уонна Өлүөхүмэ оройуоннарын диэки нуорматтан элбэх түһүөҕэ. Өрөспүүбүлүкэ атын сирдэригэр нуорма кэриҥэ эбэтэр кыра сөҥүү түһэрэ күүтүллэр. Бэс ыйын бастакы декадатыгар соҕуруулуу-илин, киин уонна соҕуруулуу- арҕаа оройуоннарга салгын температурата нуорматтан үрдүк буолуоҕа. 3 чыыһылаттан ордук киин оройуоннар улахан өттүлэригэр +23 ,+28 кыраадыс, соҕуруулуу- илин уонна соҕуруу-+30 диэри салгын температурата олохтонуоҕа«, — диэн кэпсээтэ Татьяна Маршалик.
Бэс ыйын 10 күнүттэн тымныы салгын маассатын кэлэн саҕалыаҕа. Хоту уонна Арктика оройуоннарыгар температура намтыаҕа, уулаах хаар да түһүөн сөп диэн, Маршалик чопчулаата. Ол да буоллар, ыйдааҕы чопчу билгэни билигин даҕаны оҥорор ыарахаттардааҕын тоһоҕолоон бэлиэтээтэ.
Урут Татьяна Маршалик СИА- ҕа анаан баһаарынай сезоҥҥа прогнозтары биэрбитэ. Уопсайынан, Саха сиригэр сайын сылаас уонна аҕыйах сөҥүүлээх буолара күүтүллэр.
