Кэнники биэс сылга Саха сиригэр элбэх оҕолоох ыаллар ахсааннара 15% улаатта. Бүгүн кинилэр ахсааннара 35 тыһыынча кэриҥэ. Онуоха өрөспүүбүлүкэҕэ, уопсайынан Россияҕа, бастакы уонна иккис оҕолор төрүүллэрин уопсай көрдөрүүтэ түһэр. Нэһилиэнньэ эбиллиитэ сүрүннээн үһүс, онтон кэлин оҕолор төрүүллэриттэн ситиһиллэр.
Бу туһунан кулун тутар 12 күнүгэр Саха сирин бырабыыталыстыбатын нэһилиэнньэ иннигэр 2025 сыллааҕы отчуотун түмүгэр аналлаах быһа эфиргэ өрөспүүбүлүкэ вице-премьерэ Георгий Степанов кэпсээтэ.
«Бастакы уонна иккис оҕолор төрүүллэрин балаһыанньатын көннөрбөтөхпүтүнэ, өрөспүүбүлүкэ демографическай көрдөрүүлэрэ бэйэлэрин вектордарын уларытыахтарын сөп. Онон, биһиги отчуоттуур көрсүһүүлэрбитигэр өрөспүүбүлүкэ нэһилиэнньэтэ туруорсар ийэ уонна оҕо буолуу өйөбүлүн боппуруостара бырабыыталыстыба болҕомтотун хайаан да ууруоҕа», — диэн вице-премьер бэлиэтээтэ.
Санатан эттэххэ, Саха сиригэр эдэр ыаллар бастакы оҕолоругар биир кэмнээх төлөбүрү ылаллар.
This post was published on 13.03.2026 10:09 10:09