«Уһун уонна көхтөөх олох» президент национальнай бырайыагын медицинэ бастакы звенотын модернизациялааһын бырагырааматын чэрчитинэн Саха сиригэр аҕыс улахан эбийиэк тутуута ыытыллар. Олор истэригэр Майа сэлиэнньэтигэр уонна Сангаар бөһүөлэгэр балыыһа комплекстара, Амма сэлиэнньэтигэр поликлиника, ону тэҥэ Бүлүү уонна Ньурба куораттарыгар, Нам уонна Андреевка сэлиэнньэлэригэр эмтиир корпустар киирэллэр. Ону таһынан Аллараа Бэстээх бөһүөлэгэр учаастактааҕы балыыһа тутуллар.
Итини тэҥэ Казачье, Оленегорскай уонна Сииктээх Арктика сэлиэнньэлэригэр модульнай фельдшерскэй-акушерскай пууннары тутуу ыытыллар. Быйылгы сылга хайыы-үйэ Нам оройуонун Маймаҕатыгар уонна Граф биэрэгэ сэлиэнньэлэригэр ФАП-тар үлэҕэ киирдилэр.
Өрөспүүбүлүкэ доруобуйа харыстабылын миниистирэ Лена Афанасьева дойду президенэ Владимир Путин өйөбүлүнэн Уһук Илиҥҥэ медицина табыгастаах, хаачыстыбалаах буоларын бэлиэтээтэ. Кини этэринэн, бүгүн региона медицинскэй инфраструктуратын киэҥ далааһыннаахтык саҥардыы салҕанар, балыыһалар, ФАП-тар уонна быраас амбулаториялара рекорднай ахсааннаах киирдилэр, ол түмүгэр өрөспүүбүлүкэ олохтоохторо тупсаҕай усулуобуйаҕа хаачыстыбалаах медицинскэй көмөнү ылаллар.
Былырыын үс улахан балыыһа комплекса, Элгээйи сэлиэнньэтигэр быраас амбулаторията уонна 13 фельдшерскэй-акушерскай пуун тутуллан үлэҕэ киирбиттэрэ.
Россия президенэ Владимир Путин көҕүлээбит «Уһун уонна көхтөөх олох» саҥа национальнай бырайыак чэрчитинэн 2030 сылга диэри Саха сиригэр медицинскэй тэрилтэлэри салгыы тутуу уонна капитальнай өрөмүөннээһин, ону тэҥэ анал автотранспорт уонна аныгы медицинскэй оборудованиены атыылаһыы былааннаммыт.
This post was published on 27.08.2025 13:12 13:12