Саха сиригэр регионнааҕы ийэ хапытаалынан туһанааччылар өскөтүн дьиэлэрин тупсарыныахтарын, кэҥэттиниэхтэрин баҕарар буоллахтарына, ылыахтаах суумаларын икки бүк улаатыннарар туһунан сокуон барыла оҥоһулунна.
«Бырайыак быһыытынан өрөспүүбүлүкэтээҕи ийэ хапытаалын ыларга сертификаты туппут дьиэ кэргэттэр олорор дьиэлэрин кэҥэттэр, тупсарынар буоллахтарына, ылыахтаах суумалара икки бүк улаатыннарыллар. Өскөтүн эрдэ атын сыалга эбэтэр биир кэмнээх 15 тыһ.солк. көмөнөн туһаммыт, итиэннэ элбэх оҕолоох дьиэ кэргэн быһыытынан сир учаастагын ылыыга сайабылыанньа суруйбут буоллахтарына, бу барылга киирсибэттэр«, — диэн СӨ үлэҕэ уонна социальнай сайдыыга министиэристибэтигэр эттилэр.
Биэдэмистибэҕэ эппиттэринэн, өскөтүн баар сокуоҥҥа уларытыылары киллэрдэхтэринэ ийэ хапытаалын улаатыннарыы олорор дьиэни тупсарыыга уонна кэҥэтиигэ эрэ туһуланар.
Билигин өрөспүүбүлүкэтээҕи ийэ хапытаалын кээмэйэ — 140-ча тыһ.солк.
This post was published on 07.06.2017 14:21 14:21