Хоту сиргэ дьиэ табаларын күһүҥҥү ааҕыыта Анаабыр, Булуҥ, Усуйаана уонна Аллараа Халыма оройуоннарыгар буола турар. Бу туһунан регион тыа хаһаайыстыбатын уонна ас-үөл бэлиитикэтин министиэристибэтигэр иһитиннэрдилэр.
Табаны ааҕыы муус турбутун уонна хаар бүрүөһүнэ бигэтик үөскээбитин кэннэ саҕаланар. «Тыа хаһаайыстыбатын управлениетын исписэлиистэрэ уонна ветеринардар табаһыттары кытта кэлим зоотехническай уонна ветеринарнай тэрээһиннэри, маркировканы, вакцинацияны, табаны ааҕыыны ыыталлар», — диэн биэдэмистибэҕэ быһаардылар.
Усуйаана оройуонун «Удьуор» эбээннэр көс аҕа ууһун общинатыгар күһүҥҥү корализация түмүктэннэ. Баһылык Сергей Филиппов этэринэн, маркировканан табаны барытын хаппыттар. Бүгүҥҥү күҥҥэ хаһаайыстыбаҕа 5200 таба баар.
Аллараа Халыма оройуонун «Турваургин» көс аҕа ууһун общинатын тыа хаһаайыстыбатын производственнай кээпэрэтиибигэр билигин табаны маркировкалааһын, вакцинациялааһын уонна клиническэй көрүү бара турар.
Оперативнай дааннайдарынан, Саха сиригэр 169,6 тыһыынча дьиэ хотугу табата баар, олортон 73,9 тыһыынчата төрүүр-ууһуур таба. Табаны иитии салаатыгар 1022 үлэһит кыттар. Күһүҥҥү корализация ахсынньы ортотугар түмүктэниэҕэ.
This post was published on 06.11.2025 18:03 18:03