Тайах Саха Сирин Горнай оройуонун Бэрдьигэстээх сэлиэнньэтин таһыгар трасса ааһар өттүгэр турбут. Массыына чугаһаан эрэрин көрөн, улахан кыыл суолтан тахсан, ойуур диэки сүүрэн барда. Видеоны оройуоннааҕы «Үлэ Күүһэ» хаһыат телеграм-ханаалыгар бэчээттээтилэр.
Санатан эттэххэ, тайах — Россияҕа туйахтаах кыыл биир саамай тарҕаммыт көрүҥэ. Тайах саамай элбэхтик Уһук Илиҥҥэ уонна Сибиир федеральнай уокуруктарыгар олохсуйар. Онуоха саамай элбэх ахсаан Саха сиригэр бэлиэтэнэр.
Бөдөҥ кыыл ыйааһына 680 кг тиийиэн сөп, үчүгэйдик ууга харбыыллар уонна дириҥҥэ умсаллар, тыынын мүнүүтэ аҥара тутар кыахтаах. Бу саас Хаҥалас оройуонун Покровскайыгар тайах Өлүөнэ өрүскэ муус бара турдаҕына устан иһэрин видеоҕа устубуттара.
