Саха сиригэр көҕүлээһини өйөөбүт, аборт ыытар лицензиятыттан аккаастаммыт, бастакы чааһынай клиника «Яннамед» буолла. Быһаарыыны кэлэктиип уонна акушер-гинеколог быраастар ылыннылар. Бу туһунан Саха сирин доруобуйа харыстабылын министиэристибэтигэр иһитиннэрдилэр.
«Биһиги оҕо төрүүрүн иһин, хас биирдии ийэ, хас биирдии ыал оҕо төрөөһүнүгэр ордук эппиэтинэстээхтик сыһыаннаһарыгар, дьахтар ийэ буолууттан аккаастаннаҕына содулларын дириҥник өйдүүрүн туһугар кыһалларбыт. Манна киһи сыһыанын моральнай өрүттэрин туһунан этиэм этэ. Мин санаабар, хас биирдии аборт, ханнык да түгэҥҥэ дьиэ кэргэн айгырыырыгар тириэрдэр», — диэн клиника тэрийээччитэ, генеральнай дириэктэрэ Светлана Яковлева бэлиэтээтэ.
Санатар буоллахха, Саха сирин парламена пленарнай мунньахха төрүүр дьахталлары абортка тардыыны бобор сокуон барылын бастакы ааҕыыга өйөөтө. Боппуруоска сүрүн дакылаатчытынан народнай депутат Иван Луцкан буолар. Кини этэринэн, хат буолууну тохтотуу туһунан этиллэр.
2023 сыллааҕы статистика дааннайдарынан, Саха сирин чааһынай клиникаларыгар сылга 2500-тэн 3000-кэ аборт ыыталлар. Бу тэрилтэ көрдөрөрүнэн, өрөспүүбүлүкэҕэ сылга ортотунан 7-тэн 11 тыһыынчаҕа диэри аборт оҥоһуллар.
This post was published on 31.10.2025 13:37 13:37