Саха сирин баһылыга Айсен Николаев өрөспүүбүлүкэ экономическай сайдыытын хааччыйыыга оперативнай штаб президиумун уочараттаах мунньаҕын ыытта. Көрсүһүү киин тиэмэтэ бюджет үбүн көдьүүстээхтик салайыы уонна судаарыстыбаннай дуогабардары толоруу буолла.
Николаев приоритетнай хайысхалары үбүлээһини хааччыйыыга бюджет балаһыанньатын тутуһууну бырабыыталыстыба сүрүн соругунан ааттаата.
Мунньахха бюджет үбүн көдьүүстээхтик туһаныы уонна дуогабар эбэһээтэлистибэлэрин кэмигэр толоруу регион судаарыстыбаннай бэлиитикэтин тутаах хайысхаларынан хаалар диэн бэлиэтэннэ. Бырайыак-смета докумуоннарын хаачыстыбатын тупсарыыга уонна агропромышленнай комплексы, олорор дьиэ-коммунальнай инфраструктураны уонна спортивнай эбийиэктэри сайыннарыы бырагыраамаларыгар ороскуоту оптимизациялааһыҥҥа ураты болҕомто уурулунна.
Көрсүһүү түмүгүнэн профильнай министиэристибэлэр салайааччыларыгар судаарыстыбаннай дуогабардар туолууларыгар кытаанах хонтуруолу хааччыйарга сорудахтанна, бюджеты былааннааһын көдьүүһүн үрдэтии уонна үбү саамай суолталаах бырайыактарга түмүү наадата бэлиэтэннэ.
Санатан эттэххэ, Ил Түмэн алтынньы 15 күнүгэр «2026 сылга уонна 2027 уонна 2028 сыллар былааннаах кэмнэригэр Саха Өрөспүүбүлүкэтин судаарыстыбаннай бюджетын туһунан» сокуон бырайыагынан аһаҕас истиилэри ыытыахтара.
This post was published on 14.10.2025 13:19 13:19