Быйылгы сезоҥҥа өрөспүүбүлүкэҕэ 3,5 тыһ кэриҥэ устудьуон этэрээттэрин байыастарын үлэҕэ ылыахтара. Сезон бэс ыйын 12 күнүгэр, Россия күнүгэр, саҕаламмыта. Устудьуоннар этэрээттэрин үлэлэрэ Россия Федерациятын бэрэсидьиэнэ Владимир Путин көҕүлээбит «Ыччат уонна оҕолор» национальнай бырайыагын чэрчитинэн тэриллэр, диэн НВК Саха телеграм-ханаала суруйар.
«Дойдуга уонна өрөспүүбүлүкэҕэ устудьуон этэрээтин үлэтин өйүүллэр. РФ бэрэсидьиэнэ Владимир Путин киэҥ хабааһыннаах пресс-конференциятыгар дойдубутугар тутуу этэрээттэрин сөргүтүү улахан суолтатын бэлиэтээбитэ. Оттон биһиги өрөспүүбүлүкэбит Ил Дархана Айсен Николаев устудьуон этэрээттэрин көмөтүн, кинилэр өрөспүүбүлүкэни тупсарар баҕаларын, саха дьонун олохторугар усулуобуйалары оҥоруу суолтатын ыйбыта. Ааспыт сылга биһиги устудьуоннарбыт элбэх бырамыысалыннай уонна социальнай инфраструктураҕа үлэлээбиттэрэ. Сүрүн үлэ биэрээччилэринэн Колмар, АЛРОСА, Стройтранснефтегаз, Газпром трансгаз Томск, Якутуголь, Нерюнгринскайдааҕы ГРЭС, Адгезия, СК Сэттэ, Утум+ уо.д.а. хампаанньалар буоллулар»,
– диэн «Россия устудьуон этэрээттэрин» бүтүн Россиятааҕы ыччат уопсастыбаннай тэрилтэтин Саха сиринээҕи салаатын салайааччыта Олег Сергучев эттэ.
Кини бэлиэтииринэн, быйылгы сылга үлэ аҕыс сүрүн хайысханан салҕанар: тутуу, педагогика, тыа хаһаайыстыбата, сервис, проводниктар этэрээттэрэ, мэдиссиинэ, эрдэҕэс оҕолор үлэһит этэрээттэрэ уонна аналлаах этэрээттэр
