50-тан тахса научнай чинчийии Саха сиригэр 2026 сылга өйөбүлү ылыаҕа. Бу туһунан өрөспүүбүлүкэ үөрэҕириитин уонна наукатын миниистирин солбуйааччы Михаил Присяжный социальнай ситимнэргэ быһа эфир кэмигэр иһитиннэрдэ.
Ил Дархан Айсен Николаев 2035 сылга диэри регион социальнай-экономическай уонна научнай-технологическай сайдыытын стратегиятын тэрийэр сүрүн хайысхалары бэлиэтээтэ. Олор истэригэр — федеральнай бэбиэскэни учуоттаан, тырааныспар салаатын сайыннарыы, экономика бары салаалара ирдиир энергетика уонна энергияны кэмчилиир технологиялар, ону таһынан геологияны сайыннарыы бырайыактарыгар өрөспүүбүлүкэ научнай кэлэктииптэрин кыттыыта киирсэр.
«Россия научнай пуондатын кытта 2025 сыл ахсынньытыгар илии баттаммыт сөбүлэһии чэрчитинэн, 2026 сылга өрөспүүбүлүкэ кэлэктииптэрин иникилээн тутуллар хайысхаларынан 50-тан тахса научнай бырайыагы эрэгийиэн бюджетын үбүнэн да, федеральнай үбүлээһин суотугар да өйөөһүн былааннанар», — диэн бэлиэтээтэ Михаил Присяжный.
Миниистир солбуйааччыта этэринэн, искусственнай интеллект сайдыытын уонна экономика салааларын технологическай лидерствотын хааччыйыы боппуруостарыгар туспа болҕомто ууруллар. Кини ити сыаллары ситиһэргэ бары таһымҥа — наукаттан уонна үөрэхтээһинтэн саҕалаан, экономика дьиҥнээх секторыгар оҥоһуулары практическай олоххо киллэриигэ тиийэ тиһиктээх үлэ наадатын тоһоҕолоон бэлиэтээтэ.
«2026 сыл Арассыыйаҕа норуоттар сомоҕолоһууларын сылынан биллэриллибитэ, оттон Саха Өрөспүүбүлүкэтигэр култуура сыла наука, үөрэх уонна гуманитарнай чинчийиилэр сайдыыларыгар эбии контекст туруорар», — диэтэ Михаил Присяжный.
Кини 2026 сыл регион наукатын уонна үрдүк үөрэхтээһинин систиэмэтигэр үбүлүөйдээх дьыл буоларын бэлиэтээтэ. Саха судаарыстыбаннай үнүбүрсүтүөтэ тэриллибитэ 70 сыла, Арктикатааҕы судаарыстыбаннай агротехнологическай үнүбүрсүтүөт иһинэн үрдүк аграрнай үөрэхтээһин 70 сыла, ону тэҥэ аграрнай наука үөскээбитэ 70 сылын туолар.
Ил Дархан Айсен Николаев Ил Түмэҥҥэ ыҥырыытыгар өрөспүүбүлүкэ бастыҥ үрдүк үөрэҕин тэрилтэлэрин научнай-үөрэтэр уонна инновационнай кыахтарын түмэргэ үрдүк үөрэх кыһаларын икки ардыларынааҕы кампус тэриллиитин бырайыага баарын бэлиэтээбитэ.
«Онуоха федеральнай куонкуруска кыттарга хаачыстыбалаах сайаапканы бэлэмниэххэ, кыайыыны хааччыйыахха уонна Саха сиригэр профессиональнай үөрэхтээһин уонна наука инникитин бырайыагын олоххо киллэриэххэ. Биир кэлим үөрэх тиһигин соруга эдэр дьону профессиональнай таһымнарын бэлэмнээһиҥҥэ, олоххо ситиһиилээх күүстээх киһини иитиигэ туһуланар. Ити барыта — киһи бэйэтигэр, дьиэ кэргэнин уонна уопсастыба бүтүннүүтүн туһугар олоххо ситиһиитин салайар», — диэн Айсен Николаев бэлиэтээтэ.
This post was published on 09.02.2026 14:06 14:06