Кэнники 5 сылга өрөспүүбүлүкэҕэ 102 медицина эбийиэгэ үлэҕэ киирдэ. Маннык түмүктэр бүгүн Россия президенэ Владимир Путин көҕүлээбит «Доруобуйа харыстабыла» национальнай бырайыак уонна ону салгыыр саҥа «Уһун уонна көхтөөх олох» национальнай бырайыагы олоххо киллэрии көмөтүнэн ситиһилиннилэр. Бу туһунан Саха сирин доруобуйа харыстабылын миниистирэ Лена Афанасьева регионҥа доруобуйа харыстабылын 220 сылыгар аналлаах “Хоту сиргэ экология уонна киһи доруобуйата” норуоттар икки ардыларынааҕы XVI Национальнай конгресска иһитиннэрдэ.
Тэрийээччилэр Россия президенэ Владимир Путин өйөбүлүнэн Уһук Илиҥҥэ доруобуйа харыстабылын сайыннарыыга национальнай бырайыактар уонна регионнааҕы бырагыраамалар олоххо киирэллэрин, ол чэрчитинэн дьоҥҥо медицина өҥөтүн хаачыстыбата үрдүүрүн бэлиэтээтилэр.
«Кэнники сылларга Саха сиригэр рекорднай ахсааннаах эбийиэк тутуллан киирдэ. Бүлүүгэ, Ытык-Күөлгэ, Хонууга, Чурапчыга, Уус-Майаҕа бөдөҥ балыыһалар, онкодиспансер радиологическай корпуһа, ураты медицинскэй кииннэр – сүрэх-тымыр уонна онкология кииннэрэ. Оройуоннарга 100-чэкэ ахсааннаах быраас амбулаторита уонна фельдшерскэй-акушерскай пуун тутулунна. Үлэлиир балыыһалары саҥардыы күүскэ барар-53 объекка капитальнай өрөмүөн түмүктэннэ. Итини таһынан медицина тэрилтэлэригэр аныгы медицинскэй оборудование 769, 18 көһө сылдьар мобильнай диагностическай комплекс уонна 349 санитарнай массыына үлэҕэ киирдэ. Сыллата 100% «Земский доктор» уонна «Земский фельдшер» бырагыраамалар толороллор. Ити барыта Саха сирин медицинатын кыаҕын үрдэтэргэ суолу биэрбитэ уонна медкөмө саха дьонугар өссө тиийимтиэ буолбута», — диэтэ Лена Афанасьева.
This post was published on 11.11.2025 13:05 13:05