2024 сылга Саха сирин туундаратыгар баар овцебыктары авиация көмөтүнэн ааҕан, учуокка ылыахтара. Ми-8 бөртөлүөт көтөр, үлэ Анаабыр улууһуттан от ыйын 24 күнүгэр саҕаланна. Ол туһунан өрөспүүбүлүкэ айылҕатын пааркаларын дирекциятын саайтыгар суруллар.
«Бастакы арыы Большой Бегичев буолла, харах көрүүтүнэн 15 ыстаада баара билиннэ. Саамай улахан ыстаада 39 улахан кыыллаах уонна 13 быйыл төрөөбүт кыралар бааллар. Көтүү кэмигэр арыы соҕуруу биэрэгин туһаайыытынан моржалар бааллара бэлиэтэннэ», — диэтилэр дирекцияҕа.
Авиаучуот биологическай ресурсалар управлениеларын кылаабынай исписэлииһэ Андрей Попов салалтатынан ыытыллар. Бөлөххө биология институтун сотрудниктара, ол иһигэр зубрдары, бизоннары, овцебыктары үөрэтэр кэмитиэт чилиэнэ Егор Кириллин баар.
Санаттахха, Саха сиригэр овцебыктары үөскэтии 1996 сыллаахтан саҕаламмыта, Булуҥ оройуонуттан. 1996 — 2017 сылларга 190 төбө овцебык олохсутуллубута.
Бүтэһик учуот 2011 сыллаахха ыытыллыбыта.
