Саха сиригэр үрдүк технологиялаах медицина ордук тиийимтиэ буолла. Саха эмчиттэрэ бүгүн ас буһарар систиэмэ хирургиятын саҥа ньымаларын баһылыыллар. Бу туһунан МАХ-ка регион баһылыга Айсен Николаев иһитиннэрдэ.
«Саха сиригэр үрдүк технологиялаах медицинаны утумнаахтык сайыннарабыт. М.Е. Николаев аатынан национальнай медицина киинигэр биһиги эмчиттэрбит А. С. Логинов аатынан Москватааҕы клиническай научнай киин исписэлиистэрин кытта инникилээн иһэр хирургическай технологиялары баһылыыллар. Куртахха уонна ас буһарар атын уорганнарга аныгы кыра эчэйиилээх эпэрээссийэлэр тустарынан этэбин — кыра дьөлө киириилэр нөҥүө, киһи этигэр-сиинигэр кыра күүрүүлээх, ыарыһахтар түргэнник чөлүгэр түһэллэр.
Бу үлэ Саха сирин доруобуйатын харыстабылын сайыннарыы туһунан стратегическай ыйааҕым сүнньүнэн барар. Биһиги кадр уонна технологическай кыаҕы утумнаахтык бөҕөргөтөбүт, диагностика уонна эмтээһин саҥа ньымаларын киллэрэбит, үрдүк технологиялаах көмө өрөспүүбүлүкэбит дьонугар- сэргэтигэр тиийимтиэ буоларын туһугар», — диэн Саха сирин баһылыга суруйда.
2025 сыл түмүгүнэн Саха сирин 7 548 олохтооҕо үрдүк технологиялаах медицинскэй көмөнү ылбыта. Онуоха 74,5%-на өрөспүүбүлүкэ медицинскэй тэрилтэлэригэр эмтэммит. Айсен Николаев бу көрдөрүү медицинаҕа үрдүк технология саха дьонугар өссө тиийимтиэ буоларын туһугар улаатыа диэн бэлиэтээтэ.
This post was published on 16.03.2026 18:09 18:09