2019 сылтан 2025 сылга диэри Саха сиригэр РФ президенэ Владимир Путин көҕүлээбит «Инфраструктура для жизни» национальнай бырайыагын «Формирование комфортной городской средства» федеральнай бырагыраама чэрчитинэн 147 уопсастыбаннай сир аһылынна. Итинтэн 46 эбийиэк 2025 сылга үлэҕэ киирдэ.
Олоххо киирбит бырайыактар ортолоругар Бүлүү өрүс кытыла, Майа сэлиэнньэтигэр саҥардыллыбыт «Кыайыы Суола», Томмокко дьон үөһэттэн көрөр былаһаакката, Үөһээ Бүлүү улууһун Хомустаах сэлиэнньэтигэр искибиэр, Роман Дмитриев аатынан кытыл уонна Дьокуускай куорат сөтүөлүүр сирэ, Жатайга В.П. Шамшин аатынан бульвар, ону таһынан Орто Халымаҕа Кыайыы болуоссата бааллар.
2026 сыллаахха Томмот уонна Хаандыга кытыллара, Аллараа Бэстээххэ, Өлүөхүмэҕэ уонна Аммаҕа пааркалар уонна искибиэрдэр тэриллиэхтэрэ, ону тэҥэ бүтүн Арассыыйатааҕы комфортнай куорат эйгэтин бырайыактарын күрэһин кыайыылаахтарын сэттэ эбийиэгэр үлэ саҕаланыаҕа.
«Саха сирин олохтоохторо олорор сирдэрин саҥа дьүһүнэ сыыйа-баайа маастар-былааннарга киирсэн, куораттары эрэ буолбакка, дэриэбинэлэри хабар. 2025 сыллаахха Хаандыга уонна Бэрдьигэстээх, Мэҥэ Хаҥалас улууһун Сыымах сэлиэнньэтин маастар-былааннара оҥоһуллубуттара. Өрөспүүбүлүкэ 24 нэһилиэнньэлээх пуунун маастар-былааннара бэлэм. Бу эбийиэктэри тутуу эбэтэр инвестиционнай бырагыраама эрэ буолбатах, бу өрөспүүбүлүкэ киин куоратын да, дьоҕус бөһүөлэктэр да сайдыыларын былааннаан, туохха дьулуһуохтаахпыт инники кэскилин, баҕа санаатын, итэҕэлин миссията уонна уобараһа буолар диэн куруук этэбин, ону хатылыыбын», — диэбитэ Саха сирин баһылыга Айсен Николаев Ил Түмэҥҥэ туһаайыытыгар.
This post was published on 12.01.2026 14:05 14:05