Аборт ахсаанын аччатарга өйөбүл саҥа дьаһалларын Саха Сиригэр киллэрэр санаалаахтар. Бүгүҥҥү күҥҥэ өрөспүүбүлүкэ вице-премьерэ Георгий Степанов этэринэн, көрдөрүү намтыыр эрээри, медицинэ этиитэ суох абортка быһаарыыны ылааччылар билигин да элбэхтэр. Онон олохтоох былаас сэрэтэр-иһитиннэрэр үлэни күүһүрдэр былааннаах.
Төрөөһүнү үрдэтии боппуруостара алтынньы 2 күнүгэр вице-премьер Степанов мунньаҕар көрүлүннэ. РФ уопсастыбаннай палататын профильнай хамыыһыйатын бэрэссэдээтэлин солбуйааччы, «Дьахталлар олох иһин» аһымал пуонда президенэ, РФ президенэ Владимир Путин эрэллээх киһитэ Наталья Москвитина кыттыыны ылла.
Билигин өрөспүүбүлүкэҕэ «Уһун уонна көхтөөх олох» уонна «Дьиэ кэргэн» саҥа национальнай бырайыактар чэрчилэринэн төрөөһүнү үрдэтэр бырагырааманы көдьүүстээхтик ыытыыга үлэ барарын Саха сирин вице-премьера иһитиннэрдэ. “Бары саҥаны учуоттаан, бырагыраамабытын дьоһуннаахтык саҥардыахпыт», – диэтэ Георгий Степанов.
Кини Саха сиригэр “дьахталлар консультацияларыгар” социальнай үлэһиттэр бааларын кэпсээтэ. Инникитин бу үлэҕэ клиническэй уонна социальнай психологтары тардыахтарын сөп. Ону таһынан аборт профилактикатыгар дьиэ кэргэҥҥэ табыгастаах усулуобуйа тэриллиитэ эмиэ киирэр.
«Анал социологическай ыйытыы түмүгэ оҕону төрөтүүгэ дьиэ-уот суоҕа, 20 сыл төлүөхтээх ипотеката мэһэйдиир диэн көрдөрдө. Боппуруостар 60%- на материальнай кыһалҕанан сибээстээх. Өрөспүүбүлүкэҕэ дьиэ кэргэҥҥэ табыгастаах усулуобуйаны тэрийиигэ улахан үлэ барар. Бу күннэргэ Дьокуускайга стратегическай көҕүлээһиннэр Агентстволара <…> бырайыактыыр-аналитическай сессиялара буолла. Ол түмүгүнэн бу хайысхаҕа саҥа дьаһаллар оҥоһулуннулар. Биһиги өрөспүүбүлүкэбит уонна АСИ икки ардыларыгар дьиэ кэргэни, төрөөһүнү уонна элбэх оҕону өйүүргэ бииргэ үлэлээһин туһунан былаан илии баттанна», – диэн Кэпсээтэ Георгий Степанов.
Ону тэҥэ өрүттэр Росздравнадзор чааһынай клиникаларга аборт оҥорууну тохтотуу боппуруоһугар бэрэбиэркэни ыытыытын кэпсэттилэр. “Республика ыытар үлэтигэр холбоһорго бэлэммит», – диэн Наталья Москвитина көрсүһүүгэ бэлиэтээтэ.
This post was published on 03.10.2025 11:33 11:33