Физкультуранан, спордунан дьарыктанарга чэпчэтиилэринэн анал байыаннай дьайыы кыттыылаахтара, ону тэҥэ кинилэр дьиэ кэргэттэрин чилиэннэрэ туһаныахтарын сөп. Бу хайысхаҕа үлэ РФ спордун министиэристибэтин көмөтүнэн дойду президенэ Владимир Путин көҕүлээбит «Спорт России» национальнай бырайыагын чэрчитинэн ыытыллар, диэн иһитиннэрэр sakha.gov.ru.
Саха сиригэр өйөбүл элбэх таһымнаах тиһигэ баарын Саха сирин физкультураҕа уонна спорка миниистирин бастакы солбуйааччы Гаврил Мохначевскай бэлиэтээтэ.
«Биэдэмистибэ бары спортивнай эбийиэктэригэр АБДь кыттыылаахтарыгар спордунан босхо дьарыктаныы тэрилиннэ. Кинилэр дьиэ кэргэттэрин чилиэннэригэр 50% чэпчэтиилээх. АБДь кыттыылаахтарын оҕолоро биһиги министиэристибэбит спортивнай үөрэх тэрилтэлэригэр бастакы уочараттаах бэрээдэгинэн киирэллэр, ону тэҥэ босхо спортивнай таҥаһынан хааччыйаллар», – диэн чуолкайдаата.
Маны таһынан Мохначевскай этэринэн, Саха сиригэр «Эр хоһуун» диэн анал бырайыак тэриллибит, ол чэрчитинэн АБДь бэтэрээннэригэр физкультурнай тэрээһиннэр ыытыллаллар. Бүгүҥҥү күҥҥэ бу бырайыак кыттааччыларын уопсай ахсааннара 200-тэн тахса киһи буолла.
Спорт министиэристибэтин эбийиэктэрин баазатыгар бэтэрээннэр тоҕус көрүҥүнэн дьарыктаныахтарын сөп: ох саанан ытыы, остуол тенниһэ, олорон волейбол, буулдьанан ытыы, армрестлинг, следж-хоккей, пауэрлифтинг, чэпчэки атлетика уонна харбааһын.
«Спорт, ордук кини адаптивнай көрүҥнэрэ, реабилитациялыыр, социализациялыыр көдьүүстээхтэрин бэйэбинэн билэбин, — диир АБДь кыттыылааҕа, Саха сирин ыччат дьыалатыгар уонна социальнай коммуникацияҕа миниистирэ Петр Шамаев. — Спорт олоххо төннөргө көмөлөһөр, ирдэбиллээх, наадалаах, көҕүлүүр, дьиссипилиинэҕэ сирдиир. Сибээс эргимтэтэ кэҥиир, эчэйиини кытта сибээһэ суох кэпсэтии тиэмэлэрэ тахсаллар. Ол барыта киһи бэйэтигэр сабыллыбакка, уопсастыба көхтөөх чилиэнэ буоларга уонна киниэхэ туһаны аҕаларга олус көмөлөһөр».
Ил Дархан Айсен Николаев парламеҥҥа анал туһаайыытыгар өрөспүүбүлүкэҕэ спорткомплекстар уонна стадионнар, хаҥкылыыр сирдэр уонна бассейннар тутуллалларын – 2020 сылтан араас улуустарга 40 бөдөҥ спортивнай эбийиэк киллэриллибитин бэлиэтиир.
«Түмүк баар — биэс сыл иһигэр спордунан уонна физкультуранан дьарыктанар Саха сирин олохтооҕун ахсаана балтараа төгүл элбээн, 62,5%-ҥа тиийдэ. Ол да буоллар, биһиги салгыы баран иһиэхтээхпит – статистиканы эрэ көрбөккө, бу эйгэҕэ өҥө хаачыстыбатын тупсарыахтаахпыт, ону ааһан бюджет тэрилтэлэригэр эрэ буолбакка. Чааһынай тэрилтэлэри уопсай үлэҕэ көхтөөхтүк тардыахха, дьоҥҥо миэстэтигэр инфраструктура тиийимтиэтин кэҥэтиэххэ наада. Ити билигин өрөспүүбүлүкэ спордун министиэристибэтэ муниципальнай уорганнарын кытта сүрүн соруга», — диэтэ Ил Дархан.
This post was published on 20.02.2026 10:03 10:03