Анал байыаннай дьайыы кыттыылааҕа Михаил Юмаев Дьокуускайга ас-үөл бородууксуйатын оҥорор сыаҕы арыйар былааннаах. Ону сэргэ инники былааныгар – пиэрмэр хаһаайыстыбатын тэрийии.
Михаил өр сылларга Марха микрооройуонугар уонна Маҕан сэлиэнньэтин дьаһалтатын салайбыта. 2024 сыллаахха дойдутун көмүскүүргэ анал байыаннай дьайыы зонатыгар барарга быһаарыныы ылыммыта, «Боотур» (БАРС-2) баҕа өттүнэн этэрээккэ бэлэмнэниини ааспыта уонна РФ Оборуонаҕа министиэристибэтин кытта хантараак түһэрсибитэ.
Михаил бойобуой суолун биир саамай уустук учаастага — Харьков хайысхатыгар, Купянскай оройуоҥҥа ааспыта. Артиллерийскай расчет састаабыгар күн аайы муҥутуур чуолкай, тулуурдаах, хорсун быһыыны ирдиир соруктары толороро. Кини геройдуу уонна бойобуой соруктары ситиһиилээхтик толорбутун иһин Луганскай Норуот Өрөспүүбүлүкэтин «Хорсунун иһин» мэтээлинэн наҕараадаламмыта.
Михаил байыаннай сулууспа кэнниттэн «Защитники Отечества» судаарыстыбаннай пуонда Саха сиринээҕи филиалыгар кэлбитэ, социальнай сүрүннээччинэн Туйаара Семеновна буолбута. Кини АБДь бэтэрээнэ үлэтин эйгэтин уларытарга баҕатын билэн баран, «Пиэрмэр оскуолата» федеральнайдааҕы бырагыраама чэрчитинэн Арктикатааҕы судаарыстыбаннай агротехнологическай университекка (АГАТУ) «пиэрмэр хаһаайыстыбатын тэрийээччи» идэҕэ үөрэнэригэр этии киллэрбитэ.
Россия тыатын хаһаайыстыбатын министиэристибэтин өйөбүлүнэн Россельхозбаан олоххо киллэрэр бу бырагыраамата 2025 сыллаахха анал байыаннай дьайыы кыттыылаахтарыгар аан бастаан туспа квота биэрбитэ. Бэриллибит 20-тэн тахса сайаапкаттан, АБДь алта бэтэрээнэ сүүмэрдэннэ, ол иһигэр Михаил Юмаев баар.
Кини 2025 сыл балаҕан ыйыттан ахсынньытыгар диэри пиэрмэр хаһаайыстыбатын тэрийиигэ идэтийбит бэлэмнэнии бырагырааматын ситиһиилээхтик ааста.
«”Защитники Отечества” пуонда социальнай сүрүннээччилэр куруук өйөбүл буолалар. Ханнык баҕарар ыйытыыга хоруй ылабыт, үлэҕэ киириигэ уонна идэҕэ бэлэмнэниигэ. Маны сэргэ филиал нөҥүө сир боппуруоһугар юридическай көмөнү ылбытым уонна «Геройдар кэмнэрэ» президент бырагырааматыгар кыттарга сайаапка түһэрбитим”, — диэн Михаил эттэ.
Билигин кини былааныгар — бэйэтин дьыалатын арыйыы. Маныаха 2026 сыл кулун тутар 16-20 күннэригэр пуонда филиалын былаһааккатыгар ыытыллар «Бэйэ дьыалата» үөрэх бырайыагар үөрэнии буолуоҕа.
«Демобилизацияламмыт буойуннарга приоритетнай бэрээдэгинэн мэдиссиинэ көмөтө оҥоһуллар: чинчийии, эмтээһин, кэлим медицинскэй реабилитация. Уустук анал көмөҕө «якорнай» клиникалар быһаарылыннылар. Сэрии бэтэрээннэрин, ордук ыал чилиэннэрин, өлбүт, сүппүт байыастар оҕолорун психологическай араҥаччылааһыны күүһүрдэр наадалаах. Социальнай реабилитация уонна буойуннар эйэлээх олоххо адаптацияларын боппуруостара ураты болҕомтону эрэйэллэр. Бу үөрэххэ уонна үлэҕэ киирии, уопсастыбанай олоххо кыттыһыы», – диэн былырыын ахсынньыга Ил Түмэҥҥэ туһаайыытыгар Айсен Николаев эппитэ.
This post was published on 11.02.2026 16:03 16:03