Дьокуускай — Москва рейс 150-тан тахса пассажира сиртэн тыһыынчанан миэтэрэ үрдүгүнэн көтөн иһэр сөмөлүөккэ этнографическай билиилэрин таһымын бэрэбиэркэлиэхтэрэ. Бу туһунан Саха сирин норуоттарын тас сибээскэ уонна дьыалаларыгар министиэристибэтин пресс-сулууспатыгар иһитиннэрдилэр.
«Улахан этнографическай диктант» Х Россиятааҕы сырдатар аахсыйа чэрчитинэн буолуоҕа.
«Өрөспүүбүлүкэҕэ үбүлүөйдээх аахсыйа уратытынан диктаны халлааҥҥа аан бастаан суруйуохтара», — дииллэр биэдэмистибэ иһитиннэриитигэр.
Авиапассажирдар сэтинньи 4 күнүгэр — норуот сомоҕолоһуутун күнүгэр аахсыйаҕа кыттыахтара.
Үгэс курдук этнографическай диктант онлайн уонна офлайн ыытыллыаҕа. Саха сирин үрдүнэн 310 былаһаакка аһыллыаҕа. Ыытыллар күннэр диктант саайтыгар «Площадки» салаатыгар ыйыллыбыт.
Диктаны аахсыйа официальнай саайтыгар онлайн суруйуохха сөп. Платформа сэтинньи 1 күнүттэн 00:01 чаастан — 8 күнүгэр диэри Москва бириэмэтинэн 23:59 диэри баар буолуоҕа. Кыттааччы сертификата диктант түмүктэннэҕинэ тута электроннай көрүҥүнэн бэриллиэҕэ.
Диктаҥҥа тест киэбинэн 30 уопсай федеральнайдааҕы боппуруос баар. Муҥутуур баал — 100. Сорудахтарга сөптөөх эппиэттэр диктант саайтыгар 2025 сыл сэтинньи 13 күнүттэн хойутаабакка бэчээттэниэхтэрэ.
2024 сылга Саха сиригэр 28 тыһыынчаттан тахса киһи этнографическай билиитин таһымын бэрэбиэркэлээбитэ. Кыттыы өттүнэн өрөспүүбүлүкэ Россия үрдүнэн топ-30 миэстэҕэ уонна Уһук Илиҥҥэ бастакы миэстэни ылбыта.
