Саха сиригэр 5-с сылын Российскай Федерация Президенэ Владимир Путин сорудаҕынан ыытыллар социальнай гаастааһын киэҥ далааһыннаах бырагыраамата олоххо киирэр. Үлэ «Биир Ньыгыл Россия» баартыйа норуодунай бырагырааматын чэрчитинэн ыытыллар.
«Сахатранснефтегаз» АК генеральнай дириэктэрэ Алексей Колодезников иһитиннэрбитинэн, бырагыраама 2021 сылга үлэҕэ киириэҕиттэн, өрөспүүбүлүкэҕэ 9 тыһыынчаттан тахса дьиэ ситимнээх гааска холбонно.
«Быйыл социальнай гаастааһын бырагырааматынан 950-ча дьиэ холбонно, онуоха саамай элбэх холбонуу Дьокуускайга бэлиэтэннэт. Манна лидердэр ахсааннарыгар Бүлүү, Үөһээ Бүлүү, Мэҥэ-Хаҥалас, Чурапчы уонна Горнай улуустара киирэллэр. Маны сэргэ нэһилиэнньэлээх пууннары гаастааһын өрөспүүбүлүкэтээҕи бырагыраама чэрчитинэн Саха сирин баһылыга Айсен Сергеевич Николаев сорудаҕынан уонна өйөбүлүнэн саҥа гаас ситимнэрин уонна гаас инфраструктуратын атын да эбийиэктэрин тутууга уонна уларытыыга улахан үлэ ыытыллар. Бу саха дьоно төһө кыалларынан гаастаах буолалларыгар уонна гааһы тиэйии куттала суох буолуутун үрдэтэллэригэр улахан суолталаах», – диэн бэлиэтээтэ Алексей Колодезников.
Тэрилтэ «Газпром» ПАО хампаанньаны кытары Алдан, Нерюнгри, Ленскэй уонна Өлүөхүмэ оройуоннарын гаастааһын бырагырааматын олоххо киллэрэр. Бу муниципалитеттарга 28 нэһилиэнньэлээх пуун гаастаныаҕа.
Санатан эттэххэ, Саха сирэ социальнай гаастааһын бырагырааматын толорууга көдьүүһүнэн дойдуга 7-с миэстэни уонна Уһук Илиҥҥэ бастакы миэстэни ылар.
This post was published on 22.09.2025 15:23 15:23