Саха сиригэр 8500 выпускник 2025 сыллааҕы эксээмэҥҥэ кыттар

Хаартыска: ЯСИА саайта

Кини бэлиэтээбитинэн, эксээмэннэр үс түһүмэҕинэн ыытыллаллар: эрдэтээҥи — кулун тутар 21 — муус устар 21 күннэрэ, сүрүн — ыам ыйын 23 — от ыйын 4 күннэрэ, эбии — балаҕан ыйын 4 — 23 күннэрэ. 8390 выпускник биир кэлим судаарыстыбаннай эксээмэн киэбинэн, 134 —  судаарыстыбаннай выпустуур эксээмэн киэбинэн тургутууну ааһаллар.

Эксээмэн ыытыытыгар 229 пуун бэлэмнэннэ. Миэстэлэр күүстээх болҕомтоҕо бааллар, айылҕа уонна техническай куттал учуоттанар.

«Сааскы халаан уутун уонна баһаардары кытта сибээстээх куттал баарын учуоттуубут. Наада буоллаҕына саппаас былаһааккалар үлэлиэхтэрэ. Бу эксээмэн хампаанньатын ыытыы тохтоло суох уонна куттала суох ыытылларын хааччыйыаҕа», — диэтэ миниистир солбуйааччыта.

Ааспыт сылга курдук, выпускник түмүгүн тупсарар сыалтан, биир эксээмэни хос туттарыан сөп. Баҕалаахтар от ыйын 3 күнүгэр бу маннык дьаһалынан туһаналлар. Бу күн омук тылларыгар суругунан чааһа, информатика, литература, нуучча тыла, физика уонна химия туттарыллар. От ыйын 4 күнүгэр — биология, география, омук тылларыгар кэпсээн чааһа, обществознание, история, математика (базовай уонна профильнай таһым).

This post was published on 04.04.2025 16:09 16:09