Жатай судноларын базатыгар 2030 сылга диэри 55 таһаҕас, пассажирскай флот уонна дебаркадердары саҥардар былааннаахтар. Үлэ Өлүөнэ бассейнын уу транспорын сайыннарыыга өрөспүүбүлүкэ баһылыгын ыйааҕынан оҥоһуллар бырагыраама чэрчитинэн ыытыллар. Ол туһунан иһитиннэрэр sakha.gov.ru.
Билигин ЛОРПка анаан «өрүс-муора» кылаастаах сүрүн судноны тутууга бэлэмнэнии бара турар. Судаарыстыбаннай транспортнай лизинговай хампаанньаҕа бас билиини лизиҥҥэ биэрэргэ сайаапка түһэрилиннэ.
Ону таһынан Минпромторг бырагыраамаларынан судаарыстыбаннай өйөбүлү ыларга куоҥкурустарга кыттарга докумуоннар бэлэмнэнэллэр. Урут РФ президенин көмөлөһөөччүтэ Николай Патрушев Саха сиригэр кэлэ сылдьыбытын кэннэ, дойду бырабыыталыстыбатыгар уонна Минпромторг 2026 сыллаахтан Жатай судоверфыгар саҥа суднолары тутууга субсидия көрөр туһунан боппуруоһу көрөргө сорудахтаммыта.
Санатан эттэххэ, Жатай суднолара Өлүөнэ бассейн өрүс флотун саҥардыыга сүрүн былаһаакка буолуохтара. Кини «Якутия» ТОР кыраныыссатыгар баар уонна РФ президенэ Владимир Путин сорудаҕынан өрүс флотун саҥардыыга уонна туруктаах хотугу тиэйиини хааччыйыыга тирэх база буолуоҕа.
Верфига оҥорон таһаарыыны боруобалааһын эрэһииминэн 2025 сыл муус устар 25 күнүгэр саҕалаабыттара. Тутуу бастакы түһүмэҕэ бүттэ. Ахсынньы 19 күнүгэр 2025 сыллаахха эбийиэккэ үлэлииргэ официальнай көҥүл ылыллыбыта.
Судостроитель Юлия Харлампьева, 2025 сыллааҕы Жатай судостроительнай техникумун бүтэрбит, тэрилтэ кыра эрээри, манна доҕордуу кэлэктиип үлэлиирин бэлиэтээтэ.
«Биһиги биригэдьиир-настаабынньык Николай Степанович Семенов салалтатынан үлэлиибит. Кини биһигини олус өйүүр, наадалаах сүбэлэри биэрэр. Уопсайынан, улахан уопуттаах улахан кэллиэгэлэрбит куруук уустук түгэннэри быһаарарга көмөлөһөллөр. Өйдөнөр тылынан быһаараллар, ол иһин барыта өйдөнөр. Аан маҥнай биллибэти баһылыырбыттан куттаммытым эрээри, биирдэ: «Куттанар буоллаххына, тугу да ситиспэккин», — диэбиттэрэ. Ол кэнниттэн хорсунум киирэн, плазморезканы баһылаатым уонна билигин плазменнай быһар аппараакка холкутук үлэлиир кыахтаахпын», — диэн кэпсээтэ.
Юлия Харлампьева этэринэн, кэлэктиип түмүк иһин үрдүк эппиэтинэһи өйдүүр. «Биллэн турар, эппиэтинэс олус улахан, онон бары үлэни хаачыстыбалаахтык уонна болдьоххо толорорго бары күүспүтүн уурабыт. Биһиги идэбит ситиһиилэрин, итэҕэстэрин туһунан этэр буоллахха, үчүгэйэ быдан элбэх. Бастатан туран, улахан производствоҕа үлэлиибит. Иккиһинэн, доҕордуу, эдэр кэлэктиип, үчүгэй сыһыаннаахпыт — мин ону олус сөбүлүүбүн. Үсүһүнэн, дьиэ ылар кэскил баар: сайын Жатай судоверфатын үлэһиттэрин дьиэ кэргэттэригэр саҥа дьиэни үлэҕэ киллэриэхтээхтэр, оттон соҕотох дьоҥҥо уопсай дьиэҕэ миэстэ биэрэллэр. Төрдүһүнэн, сыахтарбытыгар саҥа оборудование турар, онон үлэлииргэ олус табыгастаах. Үлэбитигэртэрилтэ тырааныспара тиэйэр, ол улахан эбии буолар: Жатайга тиийэ, төттөрү айанныырга ороскуоттаммаккын. Спортзал, душ баара эмиэ үчүгэй. Онон үлэҕэ мэлдьи үөрэ-көтө сылдьабын», — диэн тоһоҕолоон бэлиэтээтэ.
Саха сирин транспортнай инфраструктуратын сайыннарыыга үлэ Ил Дархан Айсен Николаев стратегическай ыйааҕынан ыытыллар. Докумуоҥҥа салааны саҥардыы сүрүн хайысхалара быһаарылыннылар. Бу дьаһаллары олоххо киллэрии дойду президенэ көҕүлээбит национальнай бырайыактарын соруктарыгар эмиэ сөп түбэһэр.
