Билигин дьону саахалланар туруктаах дьиэттэн көһөрүү бырагырааматын олоххо киллэрии чэрчитинэн Саха Сиригэр 48 тыһыынча киһи 894,23 тыһ. кв. м. тахса эргэрбит олорор дьиэ пуондатыттан көһөрүлүннэ. Бу туһунан СӨ тутууга министиэристибэтин тутуу уонна дьиэ-уот бэлиитикэтин департаменын салайааччыта Юрий Махначевскай «Былааһы кытта кэпсэтии» биэриитигэр иһитиннэрдэ.
«Саахалланар дьиэттэн дьону көһөрүү Россия президенэ Владимир Путин көҕүлээбит «Олох инфраструктурата» национальнай бырайыак чэрчитинэн ыытыллар. 2019 сылтан ыла атын да бырагыраама суотугар көһөрүү кээмэйин учуоттаан, 59,5 тыһыынча киһи 1 мөл. 118,5 тыһыынча квадратнай миэтэрэ хаарбах туруктаах олорор дьиэ пуондатыттан көһөрүллүө», — диэн Юрий Махначевскай эттэ.
Кини 2019 — 2025 сылларга саахалланар туруктаах олорор дьиэ пуондатыттан дьону көһөрүү бырагырааматын олоххо киллэрии болдьоҕун уһатар былааннаахтарын иһитиннэрдэ. Ол курдук, Ил Түмэн тутууга, ОДЬКХ уонна энергетикаҕа бастайааннай кэмитиэтэ «Олорор дьиэ-коммунальнай хаһаайыстыбаны реформалааһыҥҥа көмөлөһөр пуонда туһунан «Федеральнай сокуон 14 уонна 16 ыстатыйаларыгар уларытыылары киллэрэр туһунан» федеральнай сокуон бырайыагын РФ Федеральнай Мунньаҕын Судаарыстыбаннай Думатыгар киллэриигэ туһааннаах сокуон көҕүлээһинин бэлэмнээтэ. Бу боппуруос «Территорияны сайыннарыы пуондата» ППК региональнай бырайыактарын олоххо киллэриигэ дириэктэрэ Андрей Шелковай Дьокуускайга сырыытын кэмигэр кыттыһан дьүүллэһиллибитэ.
Уларыйыылар Саха сиригэр «Обеспечение устойчивого сокращения непригодного для проживания жилищного фонда» тэрээһининэн «Олох инфраструктурата» национальнай бырайыагынан көрүллүбүт лимииттэри 153 тыһ. кв.м. саахалланар туруктаах олорор дьиэ пуондатын 2017 сыл тохсунньу 1 күнүгэр диэри итинник билиниллибит хаарбах туруктаах олорор дьиэ пуондатыттан көһөрүү бырагырааматынан көһөрүүгэ ыытар кыах биэриэхтэрэ.
Юрий Махначевскай быйылгы сыл саҕаланыаҕыттан Саха сиригэр 600 тыһыынча квадратнай миэтэрэ кэриҥэ дьиэ киллэриллибитин иһитиннэрдэ. Сүрүн чааһы биирдиилээн олорор дьиэни тутуу ылар — 428 тыһыынча квадратнай миэтэрэттэн тахса.
Үлэ РФ президенэ Владимир Путин сорудаҕынан олоххо киирэр «Олох инфраструктурата» национальнай бырайыак «Олорор дьиэ» региональнай бырайыагын чэрчитинэн ыытыллар. 2025 сылга былаан 690 тыһ.кв. миэтэрэ, онтон 330 тыһ. – элбэх кыбартыыралаах дьиэлэр, 360 тыһ. – биирдиилээн дьиэлэр.
Санатар буоллахха, кэнники уон сылга өрөспүүбүлүкэҕэ 6,5 мөл.кв. миэтэрэ олорор дьиэ киирдэ. 2024 сылга 752 тыһ. кв. м тутуллубута көрүллэр кэм устатыгар муҥутуур көрдөрүү буолла.
