Саха сирин аҕа баһылыга Айсен Николаев сорудаҕынан 2022 сылтан тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы механизма кэҥээтэ. Билигин кинилэр олорор дьиэ сертификатын (бэйэлэрэ талаллар) ылыахтарын сөп. Баҕардахтарына, бэйэлэрэ эбэн эбэтэр кирэдьиит ылан үптэрин улаатыннаран олорор дьиэлэри атыылаһыахтарын сөп, ону тэҥэ ийэ хапытаалын угуохтарын сөп, диэн өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрэр.
Өрөспүүбүлүкэ тутууга министиэристибэтэ олорор дьиэ сертификатын биэрии бэрээдэгин оҥордо. Төлөбүрү социальнай адаптациялаах гражданнар ылар кыахтаахтар. Сайабылыанньа биэрээччи ол кэмҥэ сууттамматах, арыгыттан, наркоманияттан, токсикоманияттан, хроническай уонна уһаабыт психологическай ыарыылардаах диспансерга учуокка туруо суохтаах. Ону тэҥэ, бастайааннай үлэ миэстэлээх буолара ирдэнэр, үлэтигэр 12 ыйтан итэҕэһэ суох үлэлээбит буолуохтаах, ол усулуобуйа элбэх оҕолордоох эбэтэр эбэтэр 3 сааһыгар диэри саастаах кыра оҕолоох дьахталларга тарҕаммат, ону тэҥэ инбэлиит оҕону көрөн үлэлээбэккэ олорор гражданнарга тарҕаммат.
Ону таһынан сертификаты ылар быраабы 23 саастарыттан үөһэ саастаах үөрэнэ сылдьар төрөппүт көрүүтэ-истиитэ суох хаалбыт оҕолорго биэрэллэр.
Механизмы ырытан оҥорууга атын регионнар ситиһиилээх опыттара учуоттанна: Амур уобалаһын, Саратовскай уобалас, Калининград уобалас.
