Балаҕан ыйын 11 күнүттэн алтынньы 10 күнүгэр диэри Саха Сиригэр «Олорор дьиэ» баһаарынай-сэрэтэр дьаһал иккис түһүмэҕэ ыытыллар. Тэрээһиннэр чэрчитинэн 2600-тэн тахса дьиэ-уот, кыбартыыра бэрэбиэркэлэннэ, нэһилиэнньэни кытта 2100-тэн тахса кэпсэтии, инструктаж ыытылынна. Бу туһунан www.sakha.gov.ru саайт иһитиннэрэр.
Дьаһал сүрүн сыала — олорор секторга баһаартан сэрэтэр үлэни ыытыы, ахсаанын уонна содулларын аччатыы, ону тэҥэ нэһилиэнньэ ортотугар баһаартан сэрэхтээх билии таһымын үрдэтии.
Дьаһал кэмигэр олохтоох салайыныы уорганнарын, муниципальнай тэриллиилэр биэдэмистибэлэр икки ардыларынааҕы баһаар-техническэй хамыыһыйаларын, судаарыстыбаннай былаас территориальнай уорганнарын уонна баҕа өттүнэн баһаар харыстабылын салааларын кытта олорор секторга уоту сэрэтиигэ туһуламмыт профилактическай үлэ ыытыллар.
Элбэх оҕолоох ыаллар, кырдьаҕас соҕотох гражданнар олорор сирдэригэр, ону тэҥэ профилактическай учуокка турар ыалларга ураты болҕомто ууруллар. Баһаар куттала суох буолуутугар инструктаж ыытыллар уонна автономнай баһаарынай биллэрээччилэри туруорууга, үлэлэтиигэ көмө оҥоһуллар.
Санатар буоллахха, 2025 сыл олунньутуттан «Баһаары сэрэт — АДПИни туруорун» социальнай аахсыйа чэрчитинэн Саха сиригэр 2978 автономнай баһаар буруотун биллэрээччилэр олохтоммуттара. Быйыл тыыл бэтэрээннэрин уонна сэрии оҕолорун олорор сирдэригэр ураты болҕомто ууруллар – кинилэр дьиэлэригэр 472 тэрил турар.
Аахсыйаҕа ким баҕарар кыттыан сөп — өрөспүүбүлүкэ олохтоохторо, былаас уорганнарын, муниципалитеттар уонна араас тэрилтэлэр бэрэстэбиитэллэрэ. Кыттааччылар бэйэлэрэ биллэрээччилэри атыылаһан дьиэлэригэр эбэтэр наадыйааччыларга биэриэхтэрин наада.
