2027 сыл бүтүөр диэри Саха сиригэр 25 орто анал үөрэхтээһин тэрилтэтэ саҥардыллыаҕа. Бу туһунан регион баһылыга өрөспүүбүлүкэ учууталларын уонна педагогическай общественноһын XIV съеһин пленарнай мунньаҕар иһитиннэрдэ.
«Техникумнар уонна колледжтар үксүлэрэ ааспыт үйэ 70-80 сылларыгар тутуллубут дьиэлэргэ бааллар. Бу быһыыны-майгыны түргэнник уонна төрдүттэн уларытыахха наада. Онуоха биһиэхэ ити кыахпыт да уопу — билигин ппут да эппиэттиир. Билигин өрөспүүбүлүкэҕэ үөрэх эйгэтигэр улахан тутуу үлэтэ бара турар. 2018 сылтан саҥа 41 оскуола уонна 66 оҕо саада үлэҕэ киирдилэр. Сыл бүтүөр диэри өссө 13 оскуола уонна 6 уһуйаан тутуллуохтара. 38 оскуолаҕа капитальнай өрөмүөн түмүктэннэ. Аны бу курдук тэтимнээх орто анал үөрэхтээһин эйгэтигэр тутуу үлэтин ыытыахха наада», — диэтэ Айсен Николаев.
Орто анал үөрэхтээһин эбийиэктэригэр капитальнай өрөмүөннээһин уонна хааччыйыы үлэтин ыытарга биэс сыллаах бырагыраама оҥорорго өрөспүүбүлүкэ бырабыыталыстыбатын сорудахтаатылар.
«Профессионалитет» федеральнай бырайыак чэрчитинэн, Дьокуускайга тыа хаһаайыстыбатыгар үлэһиттэри бэлэмниир научнай- производственнай киин аһыллан эрэрэ бэлиэтэннэ. Кэлэр сылга Нерюнгрига хайа хостуур салааҕа аналлаах киин тэриллиэҕэ.
Кэнники үс сылга өрөспүүбүлүкэҕэ орто анал үөрэхтээһиҥҥэ 55 мастарыскыай аһыллыбыт, 2024 сылга диэри өссө 30-ча аһыллара былааннанар.
This post was published on 06.10.2022 14:03 14:03