2026 сыллаахха Саха сиригэр уопсайа 3223 миэстэлээх 7 оскуола уонна 665 миэстэлээх 4 оҕо саада үлэҕэ киириэхтэрэ. Бу туһунан өрөспүүбүлүкэ бырабыыталыстыбатын бэрэссэдээтэлин солбуйааччы Анатолий Семенов иһитиннэрдэ.
Дьокуускайга 1 №-дээх оскуоланы 253 үөрэнээччигэ, 180 миэстэлээх 4 №-дээх анал (коррекционнай) уопсай үөрэхтээһин оскуолатын, итиэннэ «Звездный» микрооройуоҥҥа 990 миэстэлээх бөдөҥ оскуоланы киллэрии былааннанар. Сунтаар уонна Нам сэлиэнньэлэригэр 450 үөрэнээччигэ оскуола, ону таһынан Өлүөхүмэ оройуонун Заречнай бөһүөлэгэр 60 миэстэлээх оскуола киллэриллиэхтэрэ.
Итини кытта тэҥҥэ Дьокуускай «Сулустаах» микрорайонугар 315 миэстэлээх дьыссаат, итиэннэ 200 миэстэлээх оҕо саадын уонна 150 миэстэлээх интернаты киллэрэр Адаптивнай үөрэх комплексын эбийиэктэрин тутуу түмүктэниэҕэ. Чурапчы улууһун Чурапчы сэлиэнньэтигэр уонна Алдан оройуонун Томмот куоратыгар 75-тии миэстэлээх саҥа дьыссааттар баар буолуохтара.
Үөрэх тиһигин сайыннарыыны 664 миэстэлээх эбии үөрэхтээһин икки эбийиэк толоруоҕа. Дьокуускайга «Полярная звезда» оҕо сынньалаҥ уонна чэбдигирдии киинин, Оттон Мииринэйгэ «Оҕо Дыбарыаһа» оҕолору эбии үөрэхтээһин киинин киллэрии былааннанар, урут тутуута сиппэтэх корпустарга олоҕуран тэриллиэхтээх.
Маны таһынан Дьокуускайга «Энергетик» оҕо лааҕырыгар 200 миэстэлээх түөрт түргэнник оҥоһуллар корпуһу киллэрии былааннанна. Маны сэргэ региоҥҥа үөрэх тэрилтэлэрин капитальнай өрөмүөннээһинин улахан бырагыраамата салгыы ыытыллыаҕа. Уопсай үөрэхтээһин эйгэтигэр үлэ 6 эбийиэк хабыллыаҕа, олортон 5-һэ икки сыллаах циклга, 1-рэ биир сыллаах циклга олоххо киирэллэр. Былааҥҥа 6 оскуола иннинээҕи үөрэх эбийиэктэрин уонна 3 орто профессиональнай үөрэх тэрилтэлэрин өрөмүөннээһин, инфраструктураны саҥардар уонна үөрэх эйгэтин хаачыстыбатын үрдэтэр кыаҕы биэрэр.
Үөрэх эбийиэктэрин хапытаалынай өрөмүөннээһин уонна тутуу бырагыраамаларын Россия үөрэҕириитин министиэристибэтэ «Биир Ньыгыл Россия» баартыйалыын бииргэ олоххо киллэрэллэр. Үлэ бары түһүмэхтэрэ уопсастыбаннай штабтар, Судаарыстыбаннай Дума депутаттарын, сенатордары, ону тэҥэ төрөппүт уонна педагогическай түмсүүлэр хонтуруолларыгар тураллар.
Саха сирин баһылыга Айсен Николаев Ил Түмэҥҥэ ыҥырыытыгар бэлиэтээбитинэн, бүтэһик биэс сыллааҕы тутуу тэтиминэн урукку уонунан сыллары баһыйар. 2020 сылтан региоҥҥа 62 оскуола уонна 36 оҕо саада киллэриллибитэ. Арктика оройуоннарын киллэрэн туран, сүүстэн тахса үөрэх эбийиэгэр хапытаалынай өрөмүөн ыытылынна. 40 тыһыынчаттан тахса оҕо ордук тупсаҕай усулуобуйаҕа үөрэнэр кыахтанна. Кини этэринэн, үлэ Саҥа национальнай бырайыактар, Уһук Илини сайыннарыы бырагыраамалара, ол иһигэр Дьокуускай уонна Нерюнгри маастар – былааннарын чэрчитинэн салҕанар.
