Дьокуускайга Саха сирин Арктикатааҕы оскуолатын базатыгар балаҕан ыйын 1 күнүгэр саха-кытай оскуолатын арыйар былааннаахтар. Киирии эксээмэннэр бэс ыйыгар саҕаланыахтара диэн оскуола директора Сардаана Татаринова иһитиннэрдэ.
«Бырабыыталыстыба быһаарыытынан биһиги балаҕан ыйын 1 күнүгэр саха-кытай оскуолатын арыйарга бэлэмнэнэбит. Сыл аайы кытай тылын дириҥник үөрэтэр бэһис кылааска үөрэнээччилэри хомуйуохпут. Оҕолор бастаан базаны ылыахтаахтар, онтон 7-с кылааска иккис омук тылын эбэр кыах баар буолуохтаах. Саха-кытай оскуолатын бэһис кылааһыгар 24 оҕо үөрэниэҕэ», — диэн Сардаана Татаринова кэпсээтэ.
Сыл аайы Саха сирин Арктикатааҕы оскуолатын выпускниктарын 20-30%-ра атын дойдулар үөрэхтэрин кыһаларыгар киирэр.
«Саха-кытай оскуолатыгар киирии эксээмэннэр бэс ыйыгар ыытыллыахтара. Баҕалаахтар Дьокуускайга кэлэн туттарсаллар. Үөрэнээччилэр норуоттар икки ардыларынааҕы эксээмэннэри туттаран, тылы билии таһымын бигэргэтиэхтэрэ», — диэн дириэктэр эбэн эттэ.
