Ойуулуур-дьүһүннүүр ускуустуба, муусука уонна физика аныгы кабинеттара 2026 сылга Саха сирин 561 оскуолатыгар арыллыахтара. Үөрэх тэрилтэлэрин саҥардыы федеральнай көҕүлээһиннэр чэрчилэринэн ыытыллар.
«Ааспыт сыл бүтүүтүгэр үөрэх министиэристибэтэ < … > үөрэх кабинеттарыгар аналлаах оборудованиелар булгуччулаах эбии испииһэктэрин бигэргэттэ. Биһиги бу докумуоннары чуолкайдык тутуһабыт — чуолаан кинилэргэ олоҕуран техниканы атыылаһыы уонна оскуолаларга тириэрдии барар», — диэн Саха сирин үөрэҕириитин уонна наукатын миниистирэ Нюргуна Соколова тоһоҕолоон бэлиэтээтэ.
2025 сыллаахха РФ президенэ Владимир Путин көҕүлээбит «Ыччат уонна оҕо» национальнай бырайыагын «Все лучшее детям» федеральнай бырагырааматынан регион 402 оскуолата саҥа матырыйаалы ылбыта. Туһуламмыт үбүнэн үлэ кабинеттара, ону тэҥэ төрөөбүт дойду куттала суох буолуутун уонна көмүскэлин төрүттэрэ саҥардылыннылар.
«Бу үөрэх дьылыгар диэри дойдубут куттала суох буолуутун уонна көмүскэлин төрүттэрин уруоктарыгар начаалынай байыаннай бэлэмнэнии кэмиттэн хаалбыт матырыйаалы туһаммыппыт. Билигин үлэ уруоктара эмиэ өйөнөллөрө олус үөрдэр. Биһиги кыргыттарбытыгар иистэнэр массыыналар дьиҥнээх бэлэх буолаллар, оттон уолаттар фрезердары, лобзиктары кытта үлэлииллэр», — диэн Алдан үөрэҕин департаменын начальнига Елена Хрущ бэлиэтээтэ.
Ол курдук, Ийэ дойду куттала суох буолуутун уонна көмүскэлин төрүттэрин кабинеттарыгар улахан киһиэхэ сүрэх-тыҥа реанимациятын оңорорго тренажер-макетынан, Калашников автоматын макетынан уонна илии гранататын муляжтарынан хааччылыннылар. Үлэ кабинеттарыгар холодильнай ыскааптары, иистэнэр массыыналары, маһынан уһанарга аналлаах прибордары уонна дьиэни тэринэн олорууга дьарыктанар манекеннары туруорулуннулар.
«ОБЗР уонна үлэ уруоктарыгар бу улахан көстүү. Саҥа предмети киллэрии оборудованиены саҥардыыны ирдиир, онон бу үлэ хайаан да барыахтаах. Преподавателлэр астыннылар, оттон оскуола оҕолоро предмекка интэриэстэрэ биллэ улаатта», — диэн Дьокуускай үөрэх управлениетын сүрүннүүр исписэлииһэ Евдокия Постникова быһаарда.
Оскуолалары хааччыйыы Ил Дархан биир кэлим үөрэхтээһин тиһигин сайыннарыы туһунан ыйааҕын сыалыгар-соругун эппиэттиир уонна аныгы, биир кэлим уонна конкуреннаһар үөрэх эйгэтин тэрийиигэ туһуланар.
This post was published on 26.02.2026 18:03 18:03