Өрөспүүбүлүкэ үс сыллаах судаарыстыбаннай бюджетын тыырыы чэрчитинэн Саха сирин бырабыыталыстыбата гражданнар социальнай өйөбүллэригэр сүрүн хайысхаларынан үбүлээһин кээмэйин оннунан хаалларыаҕа. Бу туһунан сайт иһитиннэрэр www.sakha.gov.ru.
2026 сылга социальнай эйгэҕэ бюджет кээмэйэ 26,76 млрд солк. буолуоҕа, ити 210,5 мөл.солкуобайынан 2025 сыл көрдөрүүтүн куоһарар, диэн Саха сирин үбүн миниистирин эбээһинэһин толорооччу Иван Алексеев иһитиннэрдэ.
«Социальнай эйгэни бигэ туруктаах уонна сөптөөх үбүлээһин бырабыыталыстыба инники тутар туруорсуутун көрдөрөр», — диэн бэлиэтээтэ.
2026 сылга оҕолоох ыаллары өйөөһүнү күүһүрдэр былааннаах, үбүлээһини улаатыннарыы «Дьиэ кэргэн» өрөспүүбүлүкэтээҕи ийэ хапытаалыгар 117,5 мөл.солк. (+4,4%), эдэр ыалларга төлөбүрдэр уонна оҕо төрөөбүтүгэр биир кэмнээх босуобуйалар буолуохтара, онуоха бары үлэлиир бырагыраамалар – оннунан хаалыахтара.
2026 сылга элбэх оҕолоох ыаллары, аҕа көлүөнэҕэ аналлаах бырагыраамалары өйөөһүҥҥэ, инбэлииттэри уонна инбэлиит оҕолору реабилитациялааһыҥҥа, ону тэҥэ социальнай хайысхалаах коммерческайа суох тэрилтэлэри сайыннарыыга ураты болҕомто ууруллуоҕа. Социальнай эбийиэктэри тутууга Саха сирин Инвестиционнай бырагырааматын чэрчитинэн 764,4 мөл. солк. ыытыллыа диэн бэлиэтээтэ өрөспүүбүлүкэ үбүн министиэристибэтин баһылыга.
Инньэ гынан, 2026 сылга Саха сиригэр өйөбүл баар бары дьаһаллара тутуһуллубакка, оҕолоох ыаллары өйөөһүҥҥэ уонна социальнай инфраструктураны сайыннарыыга туһуламмыт бырагыраамалар үбүлээһиннэрэ улаатыаҕа. Ол саха дьоно социальнай көмүскэлигэр эрэллээхтик хааларыгар кыаҕы биэрэр.
Алтынньы 22 күнүгэр Судаарыстыбаннай Мунньах XIV (уочараттаах) пленарнай мунньаҕар (Ил Тумэн) дьүүллэһии түмүгүнэн народнай депутаттар «Саха Өрөспүүбүлүкэтин 2026 сылга уонна 2027 уонна 2028 сыллар былааннаах кэмнэригэр судаарыстыбаннай бюджетын туһунан» сокуон бырайыагын бастакы ааҕыыга ылыннылар.
