2025 сыллаахха Саха сиригэр уопсайа 1 826 миэстэлээх саҥа үөрэх эбийиэктэрэ үлэҕэ киирбиттэрэ. Инфраструктура уонна үөрэх дьаһалларын олоххо киллэрии түмүктэрэ тохсунньу 21 күнүгэр үөрэх уонна наука министиэристибэтин салаатын үлэһиттэрин Тохсунньутааҕы мунньаҕар буолбут отчуокка этилиннэ. Ол туһунан www.sakha.gov.ru сайт суруйар.
Тэрээһиҥҥэ араас таһымнаах үөрэх тэрилтэлэрин салайааччылара, үөрэх управлениетын муниципальнай уорганнарын бэрэстэбиитэллэрэ, социальнай партнердар, педагогическай үлэ бэтэрээннэрэ уонна уопсастыбаннай түмсүүлэр бэрэстэбиитэллэрэ кыттыыны ыллылар. Киирии тылыгар Саха сирин үөрэҕириитин уонна наукатын миниистирэ Нюргуна Соколова отчуоттуур сылга биэдэмистибэ үлэтэ федеральнайдааҕы уонна регионнааҕы приоритеттарга сөп түбэһиннэрэн ыытыллыбытын бэлиэтээтэ.
«2025 сылга министиэристибэ үлэтэ барыта национальнай бырайыактары, Российскай Федерация президенин уонна өрөспүүбүлүкэ баһылыгын ыйаахтарын толорууга туһуламмыта. Сүрүн сорук — Саха сирин нэһилиэнньэтин уонна ыччатын үөрэх наадыйыыларын толору хааччыллыыта буолла», — диэтэ Нюргуна Соколова.
Сыл устата региоҥҥа тоҕус саҥа үөрэх эбийиэгин тутуу түмүктэннэ. Олор истэригэр — түөрт уопсай үөрэхтээһин оскуолата, икки оҕо саада, икки спорт саалата уонна «Илгэ» оҕо чэбдигирдэр лааҕыра бааллар. Балары сэргэ 22 үөрэх тэрилтэтигэр хапытаалынай өрөмүөн ыытылынна, ол иһигэр 18 оскуола, икки оҕо саада уонна икки орто профессиональнай үөрэх тэрилтэлэригэр. Саҥардыллыбыт инфраструктураны сэттэ тыһыынчаттан тахса үөрэнээччи уонна иитээччи туһанар.
Инфраструктура блоктарын түмүктэрин ырытан туран, миниистир былааннааһыҥҥа демографическай параметрдар да, үлэлиир дьиэлэр туруктара да учуоттаммыттарын тоһоҕолоон бэлиэтээтэ. «Биһиги саҥа үөрэх миэстэлэрин тэрийэр уонна баар эбийиэктэри саҥардар соруктары утумнаахтык быһаарабыт. Ити өрөспүүбүлүкэҕэ үөрэх ситимэ биир тэҥ сайдыытын хааччыйар кыаҕы биэрэр», — диэн бэлиэтээтэ Нюргуна Соколова.
Сиһилии манна аах.
