Саха сирин гражданскай оборуона дьыалаларыгар министиэристибэтин дааннайынан, регион наадайыытыгар 1 054,6 тыһ. туонна таһаҕас тиэрдилиннэ. Нэһилиэнньэни уонна экономиканы тыын суолталаах ресурсаларынан хааччыйыы былаана туолла.
Гражданскай оборуона дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистир солбуйааччыта Никита Павлов сакаасчыттар тиэйэр-таһар тэрилтэлэри, нефтебазалары уонна олохтоох филиаллары кытта тэҥнээһин ыытыллыахтааҕын бэлиэтээтэ.
Уу тырааныспарын сырыыта балаҕан ыйын 30 күнүттэн учаастактарынан сабыллан, Арктикаҕа Дьааҥы, Индигир уонна Халыма өрүстэригэр тохтоото. Онуоха Россия тырааныспарга министиэристибэтэ навигация болдьоҕун алтынньы 15 күнүгэр диэри уһатар туһунан быһаарыытын көмөтүнэн, муора учаастагар суднолар үлэлэрин салгыы ыытан, таһаҕаһы аналлаах сирдэригэр тиэрдэр кыахтанна.
Хотугу тиэйии-таһыы түмүктэниитэ өрөспүүбүлүкэ саамай ыраах оройуоннарыгар тыын суолталаах таһаҕаһы кэмигэр тиэрдии — регионнааҕы уонна федеральнайдааҕы былаас органнарын, транспортнай хампаанньалар уонна муниципальнай тэриллиилэр бииргэ үлэлээбиттэрин түмүгүнэн буолла.
Источник: sakha.gov.ru
This post was published on 15.10.2025 12:02 12:02