Саха сиригэр 2021 сыл бүтүөр диэри алта спортивнай эбийиэк үлэҕэ киириэҕэ. Ол туһунан спорт миниистирэ Иннокентий Григорьев СИА «Якутия. 20 лет в 21 веке» анал бырайыагар кэпсээтэ.
«2021 сылга спорт министиэристибэтэ өрөспүүбүлүкэ үрдүнэн алта бөдөҥ эбийиэги үлэҕэ киллэрэр былааннаах. Өрөспүүбүлүкэ инвестиционнай бырагырааматынан Алдаҥҥа «Энергетик» СОК оҥоһуллар. Бэрдьигэстээххэ 1000 миэстэлээх стадион уонна 50 миэстэлээх, интернаттаах ытар комплекс, Үөһээ Бүлүү улууһун Андреевское сэлиэнньэтигэр спортивнай единоборство комплекса тутуллаллар», – диэтэ Иннокентий Григорьев.
Итини сэргэ, миниистир эппиитинэн, «Моя Якутия в XXI веке» үтүө дьыала хамсааһын чэрчитинэн Хаҥалас улууһун Покровскайыгар Л.Н. Спиридонов аатынан тустуу саалата, культурнай-спортивнай комплекс Өлүөхүмэ улууһун Куду-Күөлүгэр тутуллаллар. Маны сэргэ нэһилиэктэргэ биэс спортбылаһаакка ГТО нуорматын туттарыыга анаан оҥоһуллаллар.
This post was published on 28.04.2021 16:01 16:01